ORANJESTAD.- Polis di Aruba ta informá di un kaso tristu ku a tuma lugá un ratu pasa. E informashon inisial ta indiká ku djadumingu trai mèrdia banda di 2:58 pm sentral di polis a risibí informashon di un aksidente ku a tuma lugá riba e kaminda di Grapefield na San Nicolas. Un vehíkulo UTV tabata embolbí den un aksidente i un di e personanan, un hende muhé, a resultá hopi grave.
Mesora a manda patruya di polis i ambulans na e sitio. Na yegada a konstatá enbèrdat ku un UTV di un manera òf otro a bòltu i e shofùr ta den un situashon hopi delikado. Personal di ambulans a duna e víktima asistensia médiko, pero lamentablemente no por a hasi nada mas pe.
Dòkter Forensico a presentá i a konstatá morto di e hende muhé Kimberly van Ardenne nase na Hulanda 1 novèmber 2002 (23aña). Lamentablemente esaki ta bira e di 10 morto den tráfiko pa aña 2026. Kuerpo Polisial Aruba ta manda palabra di kondolensia na famia di e defuntu.
