WASHINGTON, AP.- E fiskal spesial Robert Mueller ta eksaminá un reunion ku no tabata konosí, entre Roger Stone i un personahe ruso ku a purba bend’é informashon pa perhudiká e kandidato demókrata Hillary Clinton. Stone ta un eks konfidente di presidente Donald Trump.
E reunion entre Stone i un hòmber ku a identifiká komo Henry Greenberg a wòrdu deskribí den un par di karta manda djabièrnè na Komishon di Inteligensia di Kámara di Representante. E korant The Washington Post tabata e promé pa reportá esaki.
Stone i Michael Caputo, un asesor di kampaña di Trump kende a organisá e reunion na aña 2016, no a revelá e kontakto aki den su entrevistanan dilanti e komishon. Sinembargo, awor nan ta kere ku e hòmber tabata un informante di FBI ku a purba pone un trampa den un intento pa perhudiká e kampaña di Trump.
No tabata posibel pa drenta den kontakto ku Greenberg pa haña un komentario, pero den un teksto mandá pa Post el a rechasá di tabata trahando ku FBI na momentu ku el a reuní ku Stone.
Den kartanan ku The Associated Press a risibí i skibi pa abogadonan di Stone i Caputo, esakinan ta afirmá ku na final di 2016, Caputo a risibí un yamada di telefòn di su sosio empresarial ruso kaminda el a presentá Greenberg, kende a bisa ku e tabatin informashon tokante Clinton.
Caputo a sugerí ku Greenberg a reuní ku Stone, kende a bandoná e kampaña di 2015 pero a kontinuá komo un asesor informal di Trump.
