*Aliadonan i enemigunan di Merka, alarmá pa e kaptura di e presidente venezolano, Maduro, a reakshoná riba e akshon norteamerikano riba suela venezolano. Ayera durante di henter dia tantu aliadonan komo enemigunan di Washington i Caracas a sigui ekspresá nan preokupashon. Maduro a pasa su promé anochi den un prizòn di New York despues dje impaktante entrada militar di Merka djasabra mardugá, ku e pais agresor ekspresando di a tuma kontròl dje pais riku na petrolio.
Paisnan manera China, Iran i Rusia, ku tin relashon será ku e gobièrnu di Maduro, a hasi lihé pa kondená e operashon, pero nan alarma tambe a keda kompartí ku aliadonan di Washington, entre nan Fransia i Union Europeo.
China: Gobièrnu chines a hasi un yamada riba Merka pa “inmediatamente liberá” presidente Maduro i esaki su kasá, i bandoná e plannan pa derotá e gobièrnu di Venezuela, segun un komunikado di Ministerio di Asuntunan Eksterior. Promé ku esei, diplomasia chines a kalifiká e atake den Caracas komo un menasa pa “pas i seguridat den Amérika Latina i Karibe”.
Brasil: E presidente brasilero, Luiz Inacio Lula da Silva, a bisa riba X ku e atake riba Venezuela i kaptura di Maduro “a pasa un liña i ta inaseptabel”. El a pidi komunidat internashonal a traves di Nashonnan Uní, pa “reakshoná na un manera fuerte”.
Rusia: Ministerio di Relashonnan Eksterior a pidi “firmamente” pa Merka “rekonsiderá su posishon i liberá Maduro i esaki su kasá.
Méhiko: Kansiyeria mehikano a kondená “enérgikamente e akshonnan militar ehekutá unilateralmente” kontra di Venezuela.
Colombia: Presidente Gustavo Petro a rechasá e “atakenan ku misil” na Caracas i a ordená un mobilisashon di militarnan na frontera. E mandatario di Colombia, pais ku e aña’kí ta miembro no permanente dje Konseho di Seguridat di Nashonnan Uní, a pidi pa e entidat reuní “di inmediato”. Un reunion ku a keda yamá pa awe.
Chile: E presidente saliente Gabriel Boric a manifestá su “kondena fuerte” partikularmente “kontra e anunsio ku un estado estranhero ta pretendé na ehersé kontròl dirèkt riba e teritorio venezolano”. “Awe ta Venezuela, mayan lo por ta kualke otro”, segun el a alertá.
Cuba: “Merka no tin outoridat moral ni di ningun tipo pa usa forsa pa saka e presidente venezolano for di su pais, pero sí t’asina ku e ta responsabel dilanti di henter mundu pa su integridat físiko”, segun e presidente di Cuba, Miguel Diaz-Canel, aliado di Caracas.
Nashonnan Uní: Sekretario General di Nashonnan Uní, Antonio Guterres, a ekspresá su preokupashon pa “falta di rèspèt pa leinan internashonal”, segun un bosero.
Iran: E pais akí, ku riba òrdu di Trump a keda bombardiá aña pasá, a kondená firmemente e atake militar norteamerikano.
Union Europeo: E hefe di diplomasia europeo, Kaja Kallas, a pidi rèspèt pa leinan internashonal despues di a papia ku e Sekretario di Estado norteamerikano, Marco Rubio.
Spaña: E presidente Pedro Sanchez a bisa riba X ku su pais “no a rekonosé e régimen di Maduro” pero “tampoko lo rekonosé un intervenshon ku ta violá leinan internashonal. “E operashon akí ta pusha e region direkshon pa un horizonte di insertidumbre i guera”, segun el a agregá.
Fransia: presidente Emmanuel Macron a bisa ku “e pueblo venezolano” lo por alegrá pa e fin dje diktadura Maduro i a reklamá pa un transishon pasífiko”.
Alemania: e hefe di gobièrnu, Friedrich Merz, a trese dilanti ku Maduro “a hiba e pais na un ruina”. E presidente kapturá pa Washington “a hunga un papel problemátiko den e region”, por ehèmpel “hinkando Venezuela den trafikashon di droga”.
Italia: E promé minister, Giorgia Meloni, a “legitimá e intervenshon defensivo “ di Merka na Venezuela, aunke e ta konsiderá ku “e akshon militar eksterno no ta e manera pa pone fin na régimennan totalitario”.
Reino Uní: E promé minister britániko,Keir Starmer, a trese dilanti ku tur pais “mester respetá leinan internashonal” i a agregá ku Reino Uní no a tuma parti den e operashon.
Panamá: Presidente José Raúl Mulino a pone su voto pa “un proseso di transishon ordená i legal” na Venezuela.
Guatemala: “Nos a hasi un yamada pa stòp kualke akshon militar unilateral, i respetá e prinsipionan dje Karta di Nashonnan Uní”, segun e mandatario Bernardo Arévalo.
Argentina: “E operashon di Merka “a nifiká e kaida di régimen di un diktador ku a bin ta trapa elekshonnan. “I esei no solamente pa Venezuela no ta algu bon, sino pa henter e region”, segun e presidente Javier Milei.
Ecuador: E presidente ekuatoriano, Daniel Noboa, a skibi riba X: “E ora lo yega pa tur e kriminalnan narko chavista. Nan struktura lo kai rònt e kontinente”.
Nort Korea: E pais enemigu grandi di Merka ku ta akusá Washington di ke deroká su dirigentenan, a bisa ku “e loke a pasa na Venezuela ta e violashon mas grave kontra di soberania”. “Ta un ehèmpel mas ku ta konfirmá e naturalesa deshonesto i brutal di Washington”..
Israel: E promé minister, Benajamin Netanyahu, a bisa ku Israel ta apoyá e “akshon enérgiko” di Washington “pa restourá libertat i hustisia”. “Nos ta kontentu i ta felisitá presidente Donald Trump i na mes momento ta saludá Forsanan Aereo norteamerikano pa un operashon perfekto”.
Papa Leon XIV: “E bienestar di e kerido pueblo venezolano mester prevalesé riba kualke otro kos i hiba na superashon dje violensia i pa por kana riba kaminda di hustisia i pas”. A la bes el a pidi pa garantisá e soberania dje pais karibense.
Brian Schatz: E senador demokrat a bisa ku Merka “no tin interesnan nashonal vital riba Venezuela ku ta hustifiká un guera”.
Senador Ruben Gallego: “Ta trata di un akshon ilegal. “No tin motibu pa nos ta den guera ku Venezuela”.
