WILLEMSTAD.- Ivar Asjes, entrante 2 di desèmber 2024 no ta SG (“Secretaris Generaal”) interino mas na Ministerio di Maneho di Gobernashon, Planifikashon i Servisio Públiko (BPD). Asjes huntu ku minister Shalten Hato a yega na e desishon ku e lo bai bèk den su funshon di SD (“Sector Directeur”) di Servisio Públiko. Asina e minister a informá personal di e ministerio.
E desishon ku a yega na dje ta a base di 2 punto prinsipal ku e minister i Asjes a deliberá riba dje. Na promé lugá Hato ta splika ku el a eksperensiá algun akshon ku Asjes a tuma ku mester a kana otro. Segun por komprondé for di seno di e Ministerio esaki tin di aber ku e trayekto di “Verbeteren Functioneren Overheid” (VFO). E trayekto ta kana huntu ku esun di digitalisashon kaminda Ministerio di BPD ta traha di aserka ku Hulanda pa risibí ayudo den ehekushon.
Meta ta pa drecha servisio na komunidat i alabes drecha e servisio interno di gobièrnu. Lo tin desishon ku a kai kaminda a kita sierto ámtenar i manda nan ehersé un otro funshon loke no ta karga ku aprobashon di e minister. No a informá e minister adelantá di e desishonnan aki tampoko.
Na di dos lugá Hato ta bisa ku Asjes a indiká ku e tin ‘algun meta personal’ ku e ke logra den e promé lunanan di 2025 ku ta rekerí tur su atenshon pafó di e oranan regular di trabou. Kiko e metanan personal aki ta eksaktamente e minister no ta splika, pero pa algun tempu kaba tin informashon ta bai rònt den komunidat ku ta indiká ku Asjes lo hasi un regreso den polítika aktivo. Pues, asuntunan ku mester a kana otro i metanan personal ku Asjes ke logra ta base di e desishon pa minister Hato baha Asjes for di e funshon di SG interino i pone bèk den funshon di SD di Servisio Públiko.
E minister ta gradisí tur kolega pa e koperashon ku nan a duna durante e periodo ku Asjes a fungi komo SG. Pronto lo anunsiá ken lo ta Asjes su susesor. Turesten a nombra Nadya Nersicio komo SG suplente na Ministerio di BPD.
Foto:
…Ivar Asjes…
