WILLEMSTAD.- Asosashon di Dòkternan di Kas a pidi su miembronan pa no firma nada ku SVB ainda relashoná ku e kontraktnan nobo ku lo mester drenta na vigor dia promé di yanüari awor. Manera EXTRA a informá a surgi un kontroversia komo ku den e kontrakt a establesé ku dòkternan di kas ku kumpli 65 aña mester baha, meskos ta konta pa otronan den komunidat ku tambe mester baha ku penshun ku 65 aña.
SVB a tuma e desishon despues ku e lei nobo a drenta na vigor e aña aki. E Asosiashon a indiká ku implementashon di e lei lo nifiká ku Kòrsou lo bai haña un skarsedat di dòkter di kas. Banda di esei, kalidat lo bai atras i ademas e desishon ta bin muchu riba man pa dòkternan ku ta serka di e edat ei. Nan no a haña oportunidat pa prepará nan mes debidamente pa e kambio na kaminda.
Informashon ku EXTRA a haña ta hasi menshon di e echo ku dia 4 di òktober último, SVB a manda e kontrakt individual pa tur dòkter di kas ku ta bin na remarke. Ta trata di un dokumentu di 13 página ku miembronan mester firma den kua tin un kantidat di klóusula stipulá.
Direktiva di dòkter di Kas a informá su miembronan ku nan a haña e karta dia 9 di òktober ku e petishon pa tene un reunion dia 21 di òktober pa papia riba e karta. Direktiva di Asosashon di Dòkter di Kas no a bai di akuerdo ku e fecha i a pidi un posponementu te ora ku direktiva profundisá den e materia.
Direktiva a bisa ku ya kaba a kuminsá ku un evaluashon di e kontrakt manera e ta riba mesa. Banda di esei a buska un eksperto ku lo presentá un kontrakt alternativo. Miembronan lo haña oportunidat pa duna nan punto di bista riba e kontraproposishon promé ku presentá e alternativa na SVB. Pa diskutí e alternativa aki, Asosashon di dòkter di Kas a yama un reunion pa dia 31 di òktober awor pa 7 or di anochi na Ouditorio di Selikor.
Originalmente e Asosashon a keda di bai korte ku e proposishon pero pa awor aki a skohe e kaminda di diálogo. Ekspertonan a indiká ku e chèns pa gana un kaso den korte ta relativamente abou. No ta masha kla si esei lo keda un opshon, prinsipalmente pa e miembronan ku lo sinti e impakto direkto di e desishon, esta esnan ku tin 65 aña na yanüari awor òf lo kumpli 65 aña riba término kòrtiku.
