WILLEMSTAD.- Aspafiko a risibí e MG Model 5 nobo nobo ku ta e premio grandi di nan rifa ku lo tuma lugá riba 19 di desèmber 2025, durante e sorteo di “Wega di Number Kòrsou”. E paso importante akí ta marka e komienso di un plan di desaroyo ambisioso ku Aspafiko ta bai ehekutá pa subi nivel di deporte di kabai na Kòrsou.
Lòt pa deporte di kabai
Pa finansiá e plan, Aspafiko ta kuminsá un kampaña grandi pa rekoudá fondo. For di awe, por kumpra buki i òf lòtnan pa sostené e deporte di kabai ku chèns pa gana un outo magnífiko, ku ta un MG Model 5. Direktiva di Aspafiko ta yama un danki spesial i alabes pidi Dios bendishoná Star Motors su gerensia ku a fasilitá nan un tremendo ‘deal’. Tur lòt ku keda kumprá ta yuda Aspafiko yega mas serka di su metanan pa/ku su fasilidat deportivo den Sapaté.
Plan di desaroyo den dos fase:
- Fase 1 – infrastruktura i seguridat (2025–2026)
Instalashon di elektrisidat, awa, stalnan di kabai, pòst pa seguridat i ofisina.
Fasilidatnan pa deporte i partisipante:
Espasio pa partisipante i públiko, inkluso espasio pa kambia paña tantu pa dama- i kabayero. - Fase 2 – Aksesibilidat i aparensia (2026–2027)
Konstrukshon pa kubri tribuna kontra solo/ áwaseru tantu pa e deportista komo pa e públiko durante evento.
Ku e método akí, e infrastruktura nesesario lo wòrdu instalá promé, pa seguidamente sigui desaroyá fasilidatnan pa deportistanan i públiko. Aspafiko su lokalidat lo bira un akomodashon deportivo profeshonal ku mira pa un futuro briante i duradero.
Foto 7 Paso Fino
Aspafiko ku rifa pa un MG Model 5
