WASHINGTON, USA (AFP).- Nikky Haley, rival di Donald Trump den e elekshon republikano, a kritiká e eks-presidente pa su silensio riba morto dje lider di oposishon ruso Alexei Navalni, komo tambe pa su deklarashonnan polémiko riba e relashon ku OTAN. “E no ta bisa nada riba Navalni, e ta na fabor di Putin i ta pensa ku Putin a hasi bon di mata un di su oponentenan polítiko, òf simplemente ta nifiká ku e no ta kere ku e kos aki ta un problema serio”, segun Haley den deklarashon na e kadena di televishon ABC.
“Kualke un dje kosnan ei ta preokupante, ta un problema”, segun el a agregá. Haley ta un eks-embahador merikano na ONU, i ta hopi leu tras di Trump den e pelea pa nominashon republikano pa elekshon presidensial di novèmber benidero.
E morto di Navalni (47) den un prizòn den e region Artico di Rusia a provoká kondenanan di personalidat i gobernantenan di rònt mundu, kuminsando ku e presidente merikano Joe Biden. Pero Trump, e probabel oponente di Biden den elekshon di novèmber, ainda no a bisa ni un palabra for di despues ku a informá dje morto di Navalni djabièrnè.
E komité di kampaña dje eks-presidente (2017-2021), na kende a pidi un komentario, a dirigí periodistanan na un publikashon riba e plataforma Truth Sosial di Trump ku ta bisa: “Merka ya no ta keda respetá pasobra nos tin un presidente inkompetente ku ta debil i ku no ta komprondé kiko ta pasando na mundu”. E publikashon no ta menshoná ni Navalni, Rusia òf Putin.
E falta di komentarionan ta tuma lugá dianan despues ku Trump a sorprendé a aliadonan oksidental ora ku el a bisa ku si e yega na poder na Merka lo e no defendé i kontrario, lo “alentá” Rusia pa ataká e miembronan dje aliansa militar di OTAN ku no ta kumpli ku nan obligashonnan finansiero.
Su palabranan a kousa rabiamentu presis na e momento ku tabatin un importante konferensia di seguridat global na Munich, loke a provoká un atvertensia dje sekretario general di OTAN, Jans Stoltenberg, di ku Trump no mester mishi ku e seguridat dje aliansa.
Biden tambe a kritiká e komentario dje magnate republikano kalifikando esaki di ta “peligroso i anti merikano”.
