LONDON, REINO UNI, AFP.- E paisnan europeo ku mester haña vakuna di AstraZeneca/Oxford, kual ainda mester keda aprobá, lo ta ménos ku loke a akordá inisialmente, pa motibu ku e rendimentu di un di e plantanan di fabrikashon a baha, segun indikashon di e grupo britániko djabièrnè.
E Agensia Europeo di Medikamentu (EMA) a anunsiá riba 12 di yanüari ku a haña un petishon di outorisashon pa e vakuna di COVID-19 desaroyá pa e laboratorio britániko AsraZeneca i Universidat di Oxford i ku lo tuma un desishon riba 29 di yanüari.
Despues di e anunsio di e británikonan djabièrnè, un bosero di Komishon Europeo a afirmá ku nan ta trahando “pa haña mas informashon”.
Un bosero di AstraZeneca a splika na AFP ku “ounke no tin un fecha pa kuminsá manda e vakunanan, si haña e aprobashon di Europa, e kantidat di dósis lo ta ménos ku loke a akordá inisialmente pa motibu ku e rendimentu den un sentro di fabrikashon di nos kadena di suministro europeo”.
E vakuna di AstraZeneca/Oxford ta mas barata pa produsí kompará ku su rivalnan. Ademas, e ta mas fásil pa warda i transportá, spesialmente kompará ku esun desaroyá pa Pfizer/BioNTech, kual mester keda den temperatura hopi abou (-70 grado Celsius).
