E atronoutanan Butch Wilmore (r) i Suni Williams (d) promé di a bandoná e International Space Station ayera. Nan a keda pegá nuebe luna den órbita pa finalmente ayera a regresá tera.
WASHINGTON (AFP).- Despues di un estadia no planiá di nuebe luna den espasio, dos astronouta di NASA finalmente a regresá tera, konkluyendo un mishon aksidentá ku a kapta atenshon di mundu i a bira un asuntu polítiko na Merka.
E merikanonan Suni Williams i Butch Wilmore, a regresá for di e stashon espasial internashonal (EEI) i a baha na kosta di estado di Florida, serka di Tallahassee, a bordo di un nave espasial dje empresa SpaceX, propiedat dje multimionario Elon Musk.
Wilmore i Williams, tur dos eks-piloto naval i veteranonan di otro dos mishon espasial, a yega e laboratorio orbital den yüni di 2024 den e promé buelo ku tripulashon dje Starliner di Boeing, un biaha di ida i buèlta ku mester a dura solamente ocho dia. Nan a pasa 280 dia konsekutivo den espasio.
Un kantidat di situashon tékniko ku a surgi, kompañá ku vários desishon ku NASA mester a tuma a trese kuné ku Wilmore i Williams a superá e tempu di seis luna pa rotashon di e tripulashon di EEI.
Pero ketu bai e rèkert mundial di dianan konsekutivo den espasio ta riba nòmber dje kosmonout ruso Valeri Polyakov, ku den 1995 a pasa 447 dia na bordo dje stashon Mir.
