DAVIS, CALIFORNIA, AP.- Un atakante a tira un polis di 22 aña mata. E tabatin apénas algun siman trahando i a wòrdu asesiná durante investigashon di un aksidente di tres outo, segun indikashon di outoridat na nort di California.
E sospechoso, kende no a wòrdu identifiká, a wòrdu hañá morto den un kas. Aparentemente el a kometé suisidio despues di un konfrontashon ku polis, segun Departamento di Polis di Davis.
Polis a bisa ku e agente Natalie Corona a wòrdu tirá despues di asistí un aksidente di outo djaweps, algu promé ku 7 or di anochi na wèst di Sacramento. Corona a wòrdu transportá pa Sentro Médiko UC Davis na Sacramento, kaminda el a fayesé.
Polis no a determiná kousa di e atake.
Polis a tarda vários ora purbando di logra pa e sospechoso sali di su kas, kual ta keda serka di e sitio di tiroteo. Na un dado momentu, agentenan a manda un robòt pa usa gas pa turdi e atakante.
Funshonarionan a anunsiá ku e sospechoso a wòrdu haña sin bida den e kas.
Corona a gradua den yüli di akademia di Departamento di Polis di Sacramento i a terminá su entrenamentu promé ku Pasku, segun funshonarionan. Su tata a fungi komo agente di Sheriff di kondado Colusa durante 26 aña.
