KABUL, AFGANISTAN, AP.- Un atakante suisidio di Estado Islámiko a ehekutá un atendando den un sentro di registro di elektoral den e kapital afgano djadumingu, matando por lo ménos 57 persona, segun informashon di outoridat.
E bosero di Ministerio di Salu Públiko, Wahid Majro, a bisa ku 119 persona mas a resultá heridá den e atentado djadumingu. E general Daud Amin, e hefe di polis di Kabul, a indiká ku e atake tabata di focus riba sivilnan ku a reuní pa risibí nan kredensial di identifikashon nashonal.
E eksploshon enorme por a wòrdu skuchá den Kabul kompleto, kibrando glasnan desde kilometer leu di e sitio di atake i kousando dañonan kontra vários vehíkulo serka. Polis a blòkiá tur kaminda na e sitio di eksploshon, i solamente ambulansnan por a drenta e zona. E stashonnan lokal di televishon a transmití imágennan bibu ku a mustra sentenar di persona ku a kongregá den hospitalnan serka en buska di informashon riba nan sernan kerí.
Majro a bisa ku tabatin 5 mucha i 21 muhé entre e víktimanan ku a fayesé. Mas di un dozein di menor i kasi 50 muhé tabatin herida, i el a agregá ku e kantidat di morto i personanan heridá ainda por sigui subi.
