Personanan kanando kaminda tabata e merkado históriko di Nabatieh, gravemente destrosá miéntras ku habitantenan desplasá pa e atakenan ta regresá
BEIRUT, LÍBANO, AFP.- Líbano a bisa ku atakenan di Israel a laga kuater morto na sùit di e pais ayera. Israel a indiká ku a interseptá rakètnan di Hezbollah i a lansa razianan, apesar di un akuerdo entre Merka i Iran, kual ta inkluí Líbano.
National News Agency (NNA) di Líbano a bisa ku Israel a ataká dos vehíkulo den siudat di Mayfadoun i un otro serka di Shukeen, ámbos den área di Nabatieh. Esakinan a laga kuater morto i otronan heridá.
Israel a bisa ku e atake a sosodé pa motibu ku nan a identifiká un vehíkulo sospechoso, sin spesifiká na unda.
E pais a agregá ku su sòldatnan a interseptá vários rakèt ku a keda lansá riba sòldatnan israelí na sùit di Líbano.
E kantidat di atakenan i violensia na Líbano a baha despues di e akuerdo entre Merka i Iran pa kaba ku e guera den medio Oriente. Pero atakenan israelí a mata por lo ménos sinku persona desde e akuerdo, segun indikashon di NNA.
E merkado históriko di Nabatieh na Líbano, kasi kompletamente destrosá. E minister di defensa di Israel a deklará riba 15 di yüni ku forsanan israelí lo keda na Líbano, Siria i Gaza.
