KIEV, UKRANIA, AFP.- Rusia a lansa un serie di misil kontra Kiev djaluna den dia. Esaki a pone ku residentenan a kore buska refugio den e kapital ukraniano.
Den oranan di anochi outoridatnan ukraniano a atmití públikamente ku un instalashon militar a wòrdu alkansá.
Despues di bombardeonan djadumingu den oranan di anochi, kual no a kousa dañonan importante den e kapital, sirenanan anti aéreo a bolbe zona djaluna mainta. E zonido a wòrdu siguí pa un serie di eksploshon alrededor di 11 or di mainta.
E hefe di ehérsito ukraniano, Valery Zalujny a bisa ku 11 misil Iskander-M i Iskander-K a wòrdu lansá desde nort” kontra Kiev i alrededor di esaki. Segun outoridatnan di e siudat, un hòmber a resultá heridá i a keda hospitalisá.
Parlamento ukraniano a adoptá un pakete di sanshon kontra Iran, aliado di Rusia, despues ku Kiev a afirmá ku Moscow a usa drone iraní Shahed pa ataka e kapital.
Mirando intensidat di e eksploshon di e misilnan ruso, mayoria habitante a buska refugio bou di tera, spesialmente den e sistema di metro.
Rusia a intensifiká su bombardeonan kontra e kapital ukraniano desde komienso di luna, pero te ainda, esakinan tabata tuma lugá den oranan di anochi.
