Trahadónan di Krus Kòrá ta operá na e sitio di eksploshon miéntras ku e públiko ta mira e resultado di un atake ku bòm riba e kaminda Popayan – Cali. Na e sitio ei a konstatá 25 morto i 20 hende heridá
CAJIBIO, Colombia (AFP).- Por lo ménos 31 atake di gueria a keda registrá den wikènt último den pleno kampaña presidensial di Colombia, inkluso un bòm ku a laga desena di morto riba kaminda. Ta trata dje atentado di mas pió kontra di sivilnan den último tres dékadanan. E atake ta keda atribuí pa gobièrnu na un grupo disidente di FARC, komandá pa alias Ivan Mordisco, e kriminal mas buská di Colombia i kende a nenga na firma e akuerdo históriko di pas di 2016. Awendia e ta keda finansiá ku prinsipalmente tráfiko di kokaina.
E balansa di morto pa e atake di djasabra den e departamento di Cauca a bira 31, segun e minister di defensa, Pedro Sanchez. Otro 56 persona a resultá heridá.
Periodistanan di AFP a mira kurpanan mutilá i un desena di vehíkulo huntu ku un krater enorme meimei di kaminda. A trata di esenanan ku a laga hendenan rekordá e époka di konflikto armá ku e pas a pasa’den durante di dékadanan pasá.
Gobièrnu ta atribuí e atakenan komo un represaya di e rebeldenan pa e preshon militar ku a sigui despues dje negosiashonnan di pas frakasá entre e presidente iskierdista Gustavo Petro i Mordisco.
“Ora ku usa terorismo di e manera ei ta pasobra e preshon t’asina fuerte, ku e úniko opshon ta pa ataká esnan indefenso”, segun Sanchez. Di akuerdo ku ekspertonan konsultá pa AFP, esun di djasabra ta e atentado ku mayor kantidat di víktima sivil for di despues dje atake den 2003 kontra e klup sosial El Nogal di Bogota, ku a laga 36 morto i a keda penetrá pa e èks-gueria FARC.
For di djabièrnè a registrá 31 akshon gueria den tres departamento den zùitwèst dje pais, segun e bosero di Forsanan Militar.
Segun Laura Bonilla, sup direktor di Fundashon Pas i Rekonsiliashon, e atakenan ta un parti di strategia di destabilisá ku ta buska pa mantené kontròl riba e poblashon sivil den e region.
E presidente Petro a tilda e rebeldenan di ta “teroristanan” i a ordená polis pa dòbel su persekushon. Despues di su yegada na poder den 2022 – e promé iskierdista pa bira presidente di Colombia. Petro a purba sin éksito pa negoshá pas ku organisashonnan armá grandi, kual nan a bira mas fuerte e último aña.
