BARCELONA, AP.- Un trùk a dal vários persona den e zona históriko di Las Ramblas na Barcelona, lagando vários morto, segun informashon di polis djaweps. Outoridat ta konsiderá esaki komo un akto terorista i prensa lokal a reportá ku tabatin 13 persona ku a fayesé.
Polis a konfirmá un persona morto i 100 herido. Algu despues e kanal di televishon RTVE a reportá ku polis a detené un sospechoso.
Mossos d’Esquadra, polis regional di Catalonia, a informá riba Twitter ku “ta konfirmá e atentado aki komo unu terorista. A aktivá protokòlnan pa e kasonan aki”.
Riba un pòtrèt mustra pa emisor públiko RTVE, por a mira tres persona benta riba kaya, asistí pa polis i mas hende den e área.
Polis a rondoná e kaya i sera tiendanan. Outoridat a pidi tur hende pa mantené alehá i no stroba tareanan di reskate. Un helikòpter tabata bula den e zona aki.
Las Ramblas, un kaya amplio di tienda den sentro di Barcelona, ta un di e sitionan mas konkuri pa turista.
Segun fuentenan polisial sita pa korant El Pais, e agresornan a wòrdu detené. Agentenan armá a kore den kaya i merkado lokal, registrando tienda i kafenan, buskando e atakantenan aki.
Riba pòtrèt i videonan di e sitio por a mira por lo ménos sinku persona benta abou, hañando asistensia serka polis i sivilnan.
