Iran a bolbe sufri atakenan norteamerikano ayera apesar ku tin un akuerdo pa para e guera sperando resultado di negosiashonnan.
TEHERAN, Iran (AFP).- Enfrentamentunan nobo a surgi ayera entre Iran i Merka den e kanal di Ormuz apesar ku a anunsiá un paro di e atakenan. E situashon akí a surgi na momento ku Washington a sigui warda riba un kontesta di Teheran riba su último proposishon di pas pa pone fin na e guera. E tenshonnan tambe a oumentá na e frente libanes despues ku e grupo pro-iraní Hezbolá a duna di konosé ku el a lansa misilnan kontra di un base militar den nort di Israel, komo reakshon riba atakenan israelí.
Ehérsito norteamerikano a anunsiá ayera di a “neutralisá” ku tirunan dos barku iraní ku tabata buska pa yega un haf dje pais den e gòlf di Oman, “violando e blokeo norteamerikano” ku ta na vigor for di 13 di aprel.
E agensia iraní FARS a tuma nota di “enfrentamentunan sporádiko” entre forsanan armá di e repúblika islamita i marina norteamerikano den e kanal di Ormuz. “Despues di un periodo di tiramentu na ámbos banda, e enfrentamentu a baha i kalma a regresá”, segun e agensia Tasnim.
Un ratu promé, e Ministerio di Relashonnan Eksterior iraní a akusá Merka di “violashon flagrante” dje akuerdo pa wanta ku e guera. E hefe di diplomasia norteamerikano, Marco Rubio, a atvertí ku Iran no mester kontrolá e kanal di Ormuz, paso stratégiko di ‘koolwaterstof’ di kua su blokeo di parti di Teheran for di inisio dje guera a sakudí ekonomia mundial i kaminda ketu bai tin komo 1.500 barku i 20.000 tripulante pegá.
Un luna despues dje desishon pa para e guera, Rubio a duna di konosé ku ta spera durante di dia un kontesta di iranínan riba un proposishon di pas. “Sinseramente mi ta spera ku ta un oferta serio”, el a deklará na periodistanan durante di un bishita na Roma.
