BEIRUT, LIBANON (AFP).- Mas di 100 persona a muri den un atake ku drone riba un akademia militar den sentro di Siria, kaminda tabatin un seremonia di promoshon di ofisialnan. E atake ta keda atribuí na e ehérsito di “organisashonnan terorista”.
E bombardeo, ku a tuma lugá na Homs, a laga mas di 100 morto, kasi mitar di nan ta ofisialnan i 14 sivil, segun e organisashon di derechi humano OSDH, ku sede na Reino Uní.
Mas di 125 persona a resultá heridá. Ehérsito sirio den un komunikado a duna di konosé ku e atake a keda realisá ku “drones kargá ku eksplosivo” durante di un seremonia. El a primintí di “reakshoná ku firmesa” kontra loke el a kalifiká komo “un atake terorista kobarde”.
Gruponan yihadista ku ta kontrolá un parti dje teritorio tin biaha ta usa drones armá. E siudat di Homs a bira manera un sede di e rebeldenan despues dje lantamentu pro demokrátiko di 2011. Pero forsanan di gobièrnu a rekuperá e siudat den 2017 despues di peleanan violento.
Despues dje atake kontra dje akademia militar, forsanan di gobièrnu a bombardiá e region di Ldlib, e último nèshi dje rebeldenan den nortwèst dje pais.
E guera di Siria, ku a start durante dje represhon severo gubernamental kontra dje ola di protestanan di 2011, a provoká morto di kasi mei mion hende den un pais fragmentá.
