WASHINGTON (AFP).- Merka a anunsiá di a realisá un atake nobo riba un barku den awanan internashonal di Pasífiko i a mata tres supuesto narkotrafikante. For di inisio di sèptèmber, tempu ku Merka a start un kampaña den laman di Karibe e forsanan norteamerikano a mata por lo ménos 83 persona ku na ta bisa di ta trafikantenan di droga.
“E informashon ta konfirmá ku e boto tabata envolví den un kontrabanda ilegal di droga”, segun Merka a anunsiá relashoná ku un atake ku a tuma lugá djasabra.
Ekspertonan ta indiká ku tur e mortonan ta igual na ehekushon pafó di hustisia, inkluso si ta trata di trafikantenan konosí.
Pa presidente venezolano Nicolas Maduro, ta nada mas ku “ehersisionan iresponsabel” di parti di Merka i ta mira ku mas bien ta un menasa pa Venezuela.
Trump djabièrnè a bisa ku “bon mirá” ya el a disidí su siguiente pasonan pa ku Venezuela. “Mi no por bisa bosnan kiko e ta, pero nos a avansá hopi ku Venezuela pa loke ta trata e manera pa para e fluho di droga”.
Komando Sur djadumingu a indiká ku e grupo di atake di USS Gerald Ford ta keda den Karibe “riba òrdu di Trump pa desmantelá organisashonnan kriminal transnashonal i kontrarestá narkoterorismo den defensa di pais”.
