Seguridat sibernétiko ta masha importante pa ta bon informá kiko e ta kontené. Protehá en partikular bo datonan personal, bo kuenta di banko, bo tarhetanan di krédito. Resientemente tin un kantidat di hende ku a haña e-mail kaminda ta alertá e kliente ku su karchi di kódigo ta bai kaduká i pa e klek riba e link pa asina por aktiv’é bèk. Esaki tabata otro forma pa hòrta dato di e klientenan. Djasabra a papia ku Michael de Maaijer ku ta senior information Security Analyst di Maduro & Curiel’s Bank su departamento di information Security i tambe ku Carlos Martha Section Head Investigation di e departamento di MCB di Security & Investigations.

Tabata importante pa nos sa kon importante protekshon di nos data ta na MCB. Tambe nos a haña un splikashon di e diferente tipo di scam, kon por detektá esaki i kiko kada hende mes por hasi pa protehá su mes.

Kiko a pasa…

Michael de Maaijer

Michael de Maaijer; Relashoná ku e kantidat di mail ku a bai rònt algun siman pasá por bisa ku esaki tabata un bon ehèmpel di un ‘fishing’. Fishing ta ora e malechornan ta manda masha hopi mail pa tur adrès ku nan tin. Nan ta haña adrès for di mailnan ku ta keda di ‘forward’ i ku tin tur adrès den dje. Kisas e persona a registrá pa un ‘site’ algun kaminda, tur e mail adrèsnan den nan data base, nan ta manda un fishing pe. Pa e malechornan no ta masha importante si un hende a kai aden òf niun pero nan ke kubri mas tantu hende posibel pa asina nan haña sikiera un porshento ku si ta kai aden i esei pa e malechornan ta relativamente hopi.

Carlos Martha; lamentablemente tin algun kliente ku a kai den e fishing aki. Pero di otro banda MCB ta kontentu ku tin hopi hende ku ta konsiente di e tipo di scamnan aki. Pero ainda tin personanan ku no ta kompletamente konsiente di e tipo di scamnan aki. I p’esei MCB a sigui ku programanan pa konsientisá mas tantu posibel pa evitá ku nan ta haña persona ku ta kai den e scamnan aki.

Carlos Martha

Diferente scam…

Fishing ta tira nèt i wak kiko ta haña. Fishing por partié den ‘spear fishing’ i ‘fishing’ gewon. E diferensia ta ku e spear fishing, (Harpun) ta mas dirigí riba sierto grupo òf individuo. Por ehèmpel den e kaso di nan di banko òf un instansia finansiero, ta mek  pa yega na e kuenta di e personanan.

Fishing en general ta mas general esta manda e-mail i ora haña akseso na e kòmpiuter òf e-mail di e kliente, ku e informashonnan ei nan por hasi  diferente kos. Por ehèmpel manda e-mail pa un persona i pidi pa sèn, pasobra a hañ’e ku problema.

Nigerian Scam òf Fraud 409 òf 419 tambe tin loan scam i esei ta esun kaminda ta solisitá pa un fiansa via di internèt i promé ku haña e sèn ku a hasi e fiansa pe, e malechor ta pidi pa manda sierto montante promé. I asina ta keda saka sèn te ora e kliente mes ripará ku el a hasi fiansa pero no ta hañando sèn.

Mystery shooppers scam, esei tambe ta unu basta komun último tempu. Aki ta ofresé trabounan via internèt, ta pasa sèn riba kuenta i e persona ta bai un tienda i kumpra su kosnan, manda e sèn via di un di e servisionan ku ta manda sèn afó i asina partisipá den un scam sin sa, kaminda ta sèn ku a kue di fishing di otro hende i manda pa otro hende kontra di sierto pago. Spamnan, spyware, kaminda ta instalá sierto vírus riba kòmpiuter i yega na informashonnan. Asina tin diferente tipo di scam segun sr. Martha a splika.

 

Mas komun na Kòrsou…

E tipo di scam ku mas ta bin dilanti na Kòrsou segun e representantenan di MCB ta e Fishing. Hopi bia hende ta haña un mail i nan ta kere ku den e kaso aki ta MCB a mand’é i nan ta klik e link den dje i hasi e stapnan ku e mail ta pidi. P’esei mester konsientisá hende pa chèk e mail promé ku klik den dje. Wak si e link en bèrdat ta bai pa MCB, wak si e nòmber ku for di unda e ta bin en bèrdat ta legítimo. Hopi bia esnan ku ta kometé e tipo di fechorianan aki, no ta hinka hopi tempu den traha un mail profeshonal. E ta kosta nan tempu, sèn i loke nan ke hasi ta manda mas tantu mail posibel. Purba haña 2 pa 3 hende kai aden i saka sèn pa sigui bai. Por wak tambe hopi bia e mailnan ta skibí ku fout den dje. Den mayoria kaso no ta hende ku ta papia ingles si e mail ta na ingles òf si ta papia papiamentu. Nan ta traha e mail lihé lihé òf ku ‘google translate’ i ta sali ku fout den dje. Pero tòg ta mailnan sufisiente bon ku tòg tin hende ta kai den dje. E mail  resien ta un di e poko nan ku a haña na papiamentu. Remarkabel na e mail ei tabata ku no tin niun lèter kapital i si bai e siguiente stapnan, por mira ku nan a usa un kopia di e wèpsait di banko di Aruba. A usa numbernan di telefòn di Aruba. Ta kosnan chikí ku hende no ta para ketu na dje, pero promé yega asina leu wak bon.

 

Ta importante pa wak bon

*Ta haña un e-mail ku ta bin di banko, mester kuminsá puntra; Banko mester a manda algu pa mi? Nunka no ‘download attachment’ ni klik riba link ku kualke kompania a manda pa bo. Si bo ke sa informashon subi e wèpsait original di banko na e forma ku sa hasié normalmente i verifiká. Nunka klik den niun link. Asina sinti ku tin algu ku no ta bon, tuma kontakto ku banko. I e informashonnan ku nan ta puntra, no ta esnan ku banko lo puntra. Por ehèmpel bo ‘e-pass’ kompleto, informashon ku mester tin kaba. Banko no ta manda den e-mail i bisa ku a lubidá e kliente su number di telefòn òf sédula. Esei no ta pasa. Of tambe pidi e e-pass kompleto, Ta kosnan ku nunka banko lo hasi.

 

Investigá i aktua…

Na momentu ku MCB detektá un scam nan ta wak e ‘site’ i p’esei semper ta pidi hende ku haña e e-mailnan aki pa mand’é pa banko. I di einan e departamentonan sibernétiko ta hasi mas investigashon di unda e site ta, di unda e e-mailnan por bin etc. MCB tin diferente servisio ku nan ta kuminsá baha e sitenan, bloknan pa asina si mas hende disidí na klik tòg den e e-mail, nan ta yega un site ku no ta eksistí mas i asina prevení di yena nan informashonnan.

Protehá bo mes…

E mihó forma pa un persona protehá su mes ta pa ta konsiente. Keda konsiente di métodonan nobo ku ta bin, keda atento. Tur kos ku mira ku no ta konfia i no e-mail so pero e por ta diferente forma; WhatsApp, MSN i tur kos ku ta poko straño tuma kontakto mesora ku banko òf e persona ku tin konfiansa kuné na banko i puntra si ta trata realmente di algu di banko. E kos mas importante ta pa keda konsiente.

Kiko banko mes ta hasi pa protehá e kliente…

Banko MCB tin hopi métodonan na lugá, kosnan tékniko pa prevení i kombatí e scam pero e defensa prinsipal ta e persona mes ku ta disidí di kometé e akshonnan sea yena nan informashonnan etc., etc . MCB por filtra 99% di tur kos pero esun un porshento ei nan tin mester di yudansa di tur hende; di empleadonan, klientenan i asta no klientenan ku tambe ta risibí e e-mailnan aki pa manda pa nan pa por analisá i asina purba subi e porsentahe pa blòk e kosnan aki den futuro. Kada bia mester purba keda un stap dilanti di e kriminalnan i no semper e ta fásil. E tim di MCB sinembargo ta hopi dinámiko ku ta traha 24/7 riba esaki. I MCB ta hopi sigur. Nan ta dediká na e seguridat di klientenan.

Si scam mi kuenta kiko hasi…

Hopi bia si akaso e kliente su kuenta keda di scam mayoria bia MCB ta ripara promé ku e kliente mes. Nan ta ripará pasobra nan tin diferente téknika pa alertá nan ku tin kosnan straño ta pasa riba un kuenta. I nan ta tuma kontakto mesora ku e kliente i hopi bia ta blòkia e kuenta mesora pa asina prevení mas daño.

Na momentu ku e persona sinti ku el a keda si scam òf tin transakshonnan riba su kuenta ku e no ta rekonosé. Mas pronto e tuma kontakto ku banko mas mihó, mas lihé banko haña sa mas lihé nan di banko por akshoná. Aparte di esei banko tin su hèrmèntnan pa ripará ku den sierto transakshon ‘online’ tin un patronchi ku nan no ta mira normalmente. I den e kosnan ei nan ta tuma kontakto ku e kliente, hasié pregunta i pa asina MCB por haña konfirmá si ta e kliente mes a hasi e transakshon òf no.

Den kaso ku e hende keda di scam kaba i sea nan no tabatin transakshon ainda òf tin transakshon tin un prosedura ku ta kana. Na momentu ku algu asina pasa, tin no ménos ku 5 departamento di MCB ku ta keda envolví mesora. Na promé lugá blòkia e kuenta, de-aktivá e ‘online banking’, i kuminsá e proseso mesora pa wak kiko a pasa, i kon grandi e daño ta, envolví otro departamentonan pa purba na yama bèk e transakshonnan i bai bèk e kliente i purba pa e haña su akseso nan ‘online’ banko i kuenta bèk mas pronto posibel.

Pa loke ta e parti di seguro, e representantenan di MCB a splika ku ta bon pa lesa kondishonnan bon. Si ta papia di scam ta un akshon ku e kliente mes a hasi sea konsiente òf inkonsiente ku a pone ku su kuenta a keda di hack. Den kaso ku ta algu a pasa na banko òf ku e sistema di banko, einan e kliente ta sigurá.

Hende lokal tambe envolví…

Si tin hende na Kòrsou ku ta aktua di forma kriminal i scam hende su kuenta, e representantenan di MCB a bisa ku no por ekskluí esaki. Den pasado tabatin hende ku nan a kai ariba ku sea tabata kooperá òf ku e malechornan òf tabata envolví nan mes den esei. Tabatin hende lokal tambe envolví den tipo di kasonan asina aki.

Skimming…

Tarhetanan di krédito tambe sa keda di skim. Ultimo tempu e akto aki a baha hopi teniendo na kuenta ku bankonan ta implementando e chep den e tarheta. Esei a baha e skimming hopi ku tarheta di krédito. Aki tambe mester lesa e kondishonnan bon. Tin diferente manera pa keda di skim, por ta na un mashin di ATM etc., etc. I einan mester hasi investigashon kiko por a sosodé. Tambe ta alertá ora ta hasi uso di tarheta di krédito ‘online’. Pa bo ta sigur ku e site ku bo ta riba dje ta unu sigur. I den e kaso aki nan ta duna komo konseho pa esnan ku ta hasi kompra online, ta mihó tin un tarheta di krédito ku un límite mas abou, ya asina ta evitá kualke inkumbiniensia.

 

Manera MCB nota e tipo di e-mail Fishing nan ta publik’é mesora entre otro via online banking ku ta manda mensahe ora drenta den dje.  Hopi bia MCB ta pone e mail pa e kliente por detektá si e-mail ta legítimo òf ‘fake’.

 

LAGA UN KOMENTARIO

Please enter your comment!
Please enter your name here