BERLIN, AP.- E atake di un refugiado afgano na Alemania a lanta debate tokante e kapasidat di e pais pa apsorbé migrantenan di paisnan di Medio Oriente, mayoria di kual ta warda renkor kontra e sosiedat oksidental. Riaz Khan Ahmadzai, di 17 aña, a ataká un grupo di turista di Hong Kong ku un hacha i un kuchú den trein serka di Wuerzburg, na Baviera, djaluna anochi. Esaki a laga kuater heridá. Despues el a ataká un señora aleman ku tabata kanando ku su kachó. Dos di e víktimanan tabata den kondishon kritiko.
E grupo ekstremista Estado Islámiko a tuma responsabilidat pa e echo i a publiká un video kaminda e hóben ta deklará su mes komo “un sòldat di Estado Islámiko”.
Sinembargo, outoridatnan ta bisa ku e hóben, kual a muri despues di a purba ataká polisnan, no tabatin niun vínkulo real ku ningun grupo terorista i a radikalisá su so.
Alternativa pa Alemania (AfD), un partido polítiko ku a bira popular debí na su retórika anti-inmigrante, a kalifiká e atake komo prueba ku kansier Angela Merkel a kibuká dor di permití entrada di tantu refugiado den e pais.
Georg Pazderski, un dirigente di AfD, a bisa ku e atake ta mustra ku Alemania ta ” sinta riba un bòm peligroso di tempu” formá pa míles di refugiado.
