SANA, YEMEN, AP.- Un atentado suisido ku outo bòm, kual Estado Islámiko a tuma responsabilidat pe djaluna a mata por lo ménos 54 partidario di gobièrnu den siudat di Aden, na sùit di Yemen. Asina outoridatnan a informá.
E hòmbernan tabata riba un tereno di parker serka di dos skol i un moské na momentu ku un trùk pikòp a kuminsá bèk, eksplotando meimei di e multitut, segun testigunan a indiká.
” Tabatin kadaver i partinan di kurpa tur kaminda”, asina Mohammed Osman a indiká, un bisiña ku a akudí e sitio. “E tabata un masakre”.
E kantidat di morto a oumentá di manera konstante durante dia i direktor di Ministerio di Salu di Aden, Khidra Lasour, a bisa ku 54 persona a pèrdè nan bida debí na e eksploshon aki. Kasi 70 persona a resultá heridá, inkluyendo 30 persona gravemente. Esnan ku a muri tabata preparando pa biaha pa Saudi Arabia i kombatí den e zona na frontera na nort di Yemen, kontra rebeldenan huti. E hòmbernan, mester a uni un ekspedishon di 5.000 hòmber.
