NAIROBI, KENIA, AP.- Un avalancha di seis atake aéreo merikano den un pueblo di Somalia, kual a laga 62 morto, tabata un serie di atake preventivo den antisipashon di algun atake ekstremista enorme, segun informashon di un funshonario somalí di spionahe.
Forsanan arma di Merka a indiká djaluna ku riba 15 di desèmber tabatin kuater atake ku a laga 34 morto i e dia siguiente un atake mas a laga 28 morto. E atakenan tabata dirigí na Gandarshe, kual ta keda na kosta di Somalia i na sùit di e kapital Mogadiscio.
No tabatin reportahe di ningun sivil herido ni morto, asina nan a indiká.
E atakenan a wòrdu ehersé den un koordinashon estrecho ku gobièrnu di Somalia i nan a wòrdu realisá pa “evitá ku al-Shabab ta usa áreanan isolá komo zona safe pa trama, dirigí, provoká i reklutá pa futuro atakenan”, asina e militarnan merikano a indiká den un komunikado.
E atakenan aéreo merikano tabatin kombatientenan di al-Shabab komo operativo, kual tabata preparando un gran atake kontra un base militar somalí den e region di Shebelle, segun indikashon di un funshonario di spionahe somalí, kende a papia ku kondishon pa keda anónimo.
“E atakenan a neutralisá un atake inminente”, asina el a indiká. E atakenan a impaktá tantu e kampamentu militar komo vehíkulonan di kombate na Gandarshe, segun indikashon di e funshonario na The Associated Press.
Al-Shabab a usa e pueblo históriko di Gandarshe, 48 kilometer na sùitwèst di Mogadisico, komo plataforma di e atakenan, inkluyendo outobòm pa ataká e kapital.
