Apénas 24 ora despues di su instalashon, a surgi krítikanan fuerte relashoná ku pasado dje presidente peruano nobo José Maria Balcazar.
LIMA, Perú (AFP).- Algun ora despues di a sinta komo presidente interino di Perú, e iskierdista José Maria Balcazar (83) ta enfrentá krítikanan fuerte pa deklarashonnan polémiko ku el a hasi den pasado komo tambe investigashon den su kontra pa supuesto korupshon. Eligí djárason anochi pa e puesto, e dia siguiente di destitushon direpente di José Jeri, e abogado aki kende ta un eks-hues di Korte Supremo i parlamentario for di 2021, a bira e di ocho presidente dje pais for di2016.
E mandato di Balcazar ta finalisá na kabamentu di yüli awor, ora ku instalá e presidente nobo ku gana elekshonnan presidensial dia12 di aprel benidero. “Ta un pais di hende loko, un hende ta drumi ku un presidente i ta lanta banda di un otro”, segun Fabiola Fernandez, un trahadó independiente di Lima konsultá pa AFP.
Organisashonnan feminista i di defensa di derechinan humano ayera a ekspresá nan rechaso pa deklarashonnan dje mandatario. Den 2023, durante di un debate riba prohibishon di matrimonio infantil ,Balcázar a bisa dilanti di un komishon di Parlamento ku “relashon seksual hopi trempan ta yuda e desaroyo sikológiko di e hende muhé”. “E nombramentu di un outoridat ku antesedentenan públiko kontroversial i deklarashonnan ku ta hustifiká e violashon seksual kontra di muchanan muhé i hóbennan ta generá un preokupashon berdadero”, segun e koordinadó nashonal di derechinan humano den un komunidat.
E organisashon ”Centro de la Mujer Peruana Flora Tristán” ta konsiderá ku su elekshon ta “e ekspreshon di krísis profundo di étika i demokrasia” dje pais. “Esun ku minimisá e violensia kontra di muchanan muhé i adultonan muhé no ta ekspresá un opinion aislá, sino ku nan ta revelá un aktitut komplasiente pa loke ta trata abuso”, segun e organisashon a bisa mas aleu.
Balcazar a denunsiá “leyendanan grave” ku segun e, ta buska pa kambia su palabranan, afirmando ku e tin”un trayektoria impekabel”. Pero awor ta resultá ku tin un investigashon kontra di su persona pa apropiashon ilegal di fondonan i korupshon. Tambe t’asina ku e ta un eks-hues di Korte Supremo, destituí den 2011 pa e Konseho Nashonal di Huesnan, ku a menshoná defisiensianan grave den su trabou komo tal despues ku el a anulá algun desishon hudisial.
