BEIRUT, LIBANO, AP.- Un dia di bombardeo aéreo intenso den siudat di Alepo i alrededor di esaki, a laga por lo ménos 45 morto djasabra, segun aktivistanan di oposishon.
Sentro di Medio na Alepo, kolektivo di aktivista, a bisa ku 45 persona a muri djasabra, algun ora despues ku Rusia i Merka a yega na un akuerdo pa pone fin na e violensia na Siria. Opservatorio Sirio pa Derechonan Humano, ku sede na Gran Bretaña, a bisa ku 30 persona a muri den provinsia di Alepo i 39 mas a muri despues di atakenan aéreo den provinsia di Idlib.
Ta komun ku tin diferente kantidat di morto despues di atakenan fuerte asina na Siria.
Merka i Rusia a anunsiá un trato pa un paro di kandela den e pais kompleto desde djaluna. esaki despues di un siman di focus riba Estado Islámiko i milisianonan di al-Qaeda. Ademas, a establesé límitenan nobo di operashon di forsanan di presidente sirio Bashar Assad.
Paronan di kandela anterior òf treguanan tambe a wòrdu siguí pa un oumento di violensia pasó tantu gobièrnu komo forsanan rebelde ta purba konsolidá nan posishon òf gana mas tereno den último oranan ku ta keda di e guera.
