WILLEMSTAD.- Un biaha mas Ontvanger di Kòrsou ta hala atenshon di komunidat pa ku e plachinan di number nobo korekto. Ontvanger di Kòrsou ta rekordá komunidat di Kòrsou ku por pega únikamente e plachinan di number ku a keda otorgá ofisialmente dor di Ontvanger, riba vehíkulo motorisá pa kore riba kareteranan públiko.
Ta prohibí pa imitá, falsifiká, bende plachi di number òf usa plachinan di number ku no ta ofisial! Esaki ta kastigabel i por trese konsekuensia i medida hurídiko i/òf atministrativo.
Outoridatnan lo kòntròlá ku man duru riba esaki. Si durante un kòntròl wòrdu determiná ku ta trata di un plachi di number falsifiká, imitá òf no-ofisial, lo tuma medida mesora. Esaki por ta den forma di un but i lo konfiská e plachi(nan) di number konserní.
Ontvanger ta supliká tur persona ku tin vehíkulo motorisá, pa nan vehíkulo tin e plachi di number ofisial (otorgá pa Ontvanger) pegá.
Ya basta hende a tuma nan plachi di number. Te ku siman pasá tabata falta 12 mil plachi di number nobo pa keda entregá.
