BAGDAD, IRAKI, AP.- Por lo ménos 12 persona a fayesé pa un eksploshon di bòm den un zona komersial di sentro di Bagdad. Asina un funshonario irakí a bisa djamars.
Algu despues di e atake, e grupo ekstremista Estado Islámiko a tuma responsabilidat di e atake den un komunikado publiká riba Internèt.
E outo kargá ku eksplosivo tabata di parker den serkania di mayoria shiita di Karadah, serka di un hospital i tienda, segun indikashon di un agente di polis. Mas di 28 persona a resultá heridá i 15 outo a resultá dañá, asina el a agregá.
Un hende responsabel a konfirmá e sifra di víktimanan mortal. Ambos funshonario a papia ku kondishon pa keda anónimo debí ku nan no tabata outorisá pa hasi e informashon públiko.
Den oranan trempan di djamars mainta, famia i amigunan organisá un entiero pa esnan ku a fayesé.
Na lugá di e atake, residentenan impaktá tabata eksaminá e manchanan di sanger riba kaya i e dañonan provoká den komersionan den serkania.
E grupo ekstremista Estado Islámiko a indiká den un komunikado ku e atentado suisidio tabata dirigí kontra siudadanonan shiita. The Associated Press no por a verifiká e outentisidat di e komunikado.