BOGOTA, AP.- Tabatin un atentado nobo ku eksplosivo kontra oleodukto Cano Limon- Canoveras, na nortost di e pais, segun informashon di outoridat kolombiano. Esnan ku a atribuí e atake tabata gueria Ehérsito Liberashon Nashonal (ELN).
Den komienso, ningun hende no a tuma responsabilidat pa e atake, ku a tuma lugá djadumingu mardugá den un zona rural di e region di munisipio di Tibu, den departamento na Nort di Santander. E gobièrnu no a splika dikon a atribuí esaki na ELN.E empresa a bisa ku a aktivá “un plan di kontingensia” pa evitá e kontaminashon den awa serka di e oleodukto.
Apénas djabièrnè último, presidente Juan Manuel Santos a anunsiá ku lo filma un akuerdo di pas ku FARC na Cartagena dia 26 di sèptèmber.
E akuerdo, ku ta pone fin na 52 aña di hostilidat di e grupo insurgente mas grandi di Latinoamérika, mester wòrdu ratifiká pa un referèndem nashonal dia 2 di òktober.
Na final di mart último, e gobièrnu i ELN kuminsá un proseso formal di pas pa pone fin na mas di mei siglo di hostilidat entre ámbos parti.
No opstante, e mandatario a bisa ku te ora e grupo insurgente no laga tur persona sekuestrá lòs, lo no kuminsá e etapa públiko di negosiashonnan.
