WILLEMSTAD. – Ayera den un kalor inmenso Kunuku Man i su kolaboradornan a sa di bolbe kita basta shushi for di kantu di kaya. Ayera Kunuku Man tabata aktivo riba dos karetera ku hopi porkeria bentá kantu di kaya.
Ta trata di Santa Rosaweg i Kaminda Reginald Recordino. Pa ilustrá e kantidat di porkeria tin bentá riba kaya, t’asina ku despues di mas o ménos 2,5 ora, Kunuku Man i su tim a kolektá un total di 234 kilo.
Ta trata di 490 bòternan di serbes bashí ku a pisa 98 kilo.
Un total di 375 bleki di aluminio ku a pisa 5 kilo.
Bòternan di plèstik, 700 ku a pisa 14 kilo i e sobra shushi ku a yega un peso di 117 kilo, pa un total di 234 kilo di shushi.
Esaki ta un situashon insólito ku tur siman di nobo Kunuku Man ta piki kantu kaya rònt Kòrsou.
E mensahe ta simpel, kada ken tene nan shushi den nan outo i ora yega kas ta tira nan den kliko di shushi. Mester por.
