WILLEMSTAD – Den ora nan di djamars anochi (3 di mart), nèt despues ku solo a baha, Sentro Operashonal Marítimo (MOC) di Wardakosta a risibí un yamada di Kuerpo Polisial pidiendo asistensia. Ta trata di un hende muhé turista hulandes ku a pèrdè den mondi, den besindario di Lagun.
E persona a bai kana den mondi i na un dado momento no a logra di haña e kaminda pa bai bèk. Afortunadamente, su telefòn tabata tin sufisiente bateria pa e bèl polis pa pidi asistensia.
Inmediatamente, personal di MOC a tuma kontakto ku un di e helikòpternan ku tabata riba patruya na e momento ei. Mes ora e piloto a ahustá e ruta i a bula bai ku rapides den direkshon di Lagun.
Miembro nan di Polis a keda den komunikashon ku e persona te na momento ku e helikòpter a yega na e sitio. Personal di Wardakosta den e helikòpter a logra di lokalisá e persona rápidamente i a hiba e dama Hato. A entrega e persona na miembronan di Politur ku a sigui asistí e señora debidamente.
