Moveshon riba merkado na Repúblika Demokrátiko di Congo, kaminda guera i matansa di míles di persona ta siguí tuma lugá.
NASHONNAN UNI (AFP).- Embahador di Merka na Nashonnan Uní a akusá Ruanda, ku ta apoyá e grupo armá M23 den e konflikto den ost di Repúblika Demokrátiko di Kongo, di ta hiba e region den un guera. “En bes di avansá den direkshon di pas, manera nos a mira bou di liderazgo di presidente Trump de último simannan, Ruanda ta hibando e region den un falta di stabilidat mas grandi i den un guera”, segun Mike Waltz den un reunion di Konseho di Seguridat.
Waltz a denunsiá “e alkanse i sofistikashon di e partisipashon di Ruanda” den e bisiña Repúblika Demokrátiko di Congo, for di despues ku M23 a lansa un ofensiva nobo.
E parti os di RD Congo, un region riku den rekursonan natural, ta esenario di un konflikto armá a mas ku tres dékada. E violensia a intensifiká den yanüari ora ku M23 a kapturá áreanan grandi, inkluso e siudatnan di Goma i Bukavu. E presidente norteamerikano a kere ku e konflikto den ost di Congo, kaminda algun shen mil hende ya a muri, ta entre e ocho gueranan ku el a finalisá for di momento di a regresá White House den yanüari.
