Atvertensia na bishitantenan di Mundial riba biahe pa Merka

NEW YORK (AFP).- Mas ku 120 organisashon di derechinan humano ayera a emití un atvertensia di biahe den kua ta señalá Na bishitantenan di Mundial di 2026 ku nan lo por enfrentá ”violashonnan grave di derechinan” debí na e polítika migratorio di gobièrnu di Merka. E koalishon a bisa ku fanátikonan, hungadónan, periodistanan i otro biaheronan ku asistí na Kopa di Mundu, ta kore e riesgo di keda afektá pa loke nan ta deskribí komo “fuerte agènda migratorio i kosnan kontrario na derechinan humano”, di parti dje gobièrnu di Donald Trump.
E organisashonnan a hasi un yamada riba FIFA pa preshoná gobièrnu norteamerikano pa garantisá e seguridat di tur e biaheronan pa e torneo. E kabesante di FIFA, Gianni Infantino, tin lasonan estrecho ku Trump.
“FIFA a limitá su mes na hasi deklarashonnan bashí riba derechonan humano miéntras ta aserká e gobièrnu di Trump, poniendo den riesgo pa sufri dañonan.
Basta dia kaba FIFA mester a probechá di su influensia pa hasi yamada pa kambio di polítika i duna garantianan ku ta permití pa e hendenan ta sinti nan mes sigur di por biaha i disfrutá dje weganan”, segun Jamil Dakwar, kende ta direktor di e programa di derechinan humano di Union Norteamerikano pa Libertat Sivil (ACLU).
E koalishon ta alertá ku strañeronan ku ta bishitá Merka durante di Mundial (11 yüni pa 19 di yüli) ta kore riesgonan spesífiko, entre nan “di forma arbitrario nan nenga entrada i riesgo di aresto, detenshon òf deportashon”. Tambe ta enserá “kontròlnan di retnan sosial registro di aparatonan elektróniko; aplikashon violento i no konstitushonal di leinan migratorio i perfil rasial”.
E organisashon mas aleu a señalá ku e bishitantenan por enfrentá “represhon di libertat pa ekspresá i di protesta, komo tambe oumento di vigilansia; trato kruel, inhumano i deningrante, te hasta morto”, miéntras ku nan ta detené pa Servisio di Inmigrashon i Kontrol di Duana di Merka (ICE).