BRASILIA(AFP).- Despues dje áwaseru torensial ku a provoká inundashonnan devastador luna pasá den zùit di Brasil, e region ei komo tambe refugionan ambiental manera Amazonia i Pantanal awor lo enfrentá un sekura severo, segun a keda atvertí di parti di minister di Medio Ambiente, Amarina Silva.
“Loke nos a mira ku áwaseru, awor nos ta bai mira esei ku sekura… probablemente den Amazona i Pantanal”, segun Silva a duna di konosé.
E minister a splika ku un meskla di fenómenonan natural manera El Niño i La Niña i e potensial kambio di klima, ta provokando eventonan ekstremo den Caatinga (nortost) pero tambe den siudat zùit di Rio Grande do Sul, ku ta bibando e pió desaster di klima di su historia.
E minister a partisipá den un evento ku e presidente Luiz Inacio Lula da Silva durante kua nan a firma algun akuerdo, inkluyendo un pakto ku e gobièrnu dje estadonan ku ta kubri Amazonia i Pantanal pa prevení i kombatí kandela.
Brasil a registrá un kantidat rèkòrt di kandela di mondi i selva for di yanüari te ku aprel, ku mas di 17.000 identifiká, segun sifranan ofisial.
Despues di regreso di Lula na poder den yanüari di 2023, Silva kende ta un aktivista ambiental rekonosé, a tuma riendanan dje ministerio ku el a okupá durante gran parti dje dos promé gobièrnunan dje lider iskierdista (2003-2010). For di e momento ei el a focus pa kambia e polítika dje eks-mandatario ultraderechista Jair Bolsonaro (2019-2022), spesialmente ku e meta pa pone fin na e eliminashon di áreanan enorme di vegetashon.
