MIAMI, MERKA, AFP.- Un avion a sende na kandela despues ku esaki a aterisá na Miami pa un problema ku e tren di aterisahe di e avion, segun informashon di outoridatnan.
Tres persona a wòrdu interná den hospital despues di e aksidente di buelo 203 di Red Air djamars atardi, segun bomberonan di Miami-Dade. No a menshoná niun morto òf leshon grave entre e mas di 120 personanan ku tabata na bordo di e avion.
Red Air, un aerolínea dominikano di kosto abou, lansá den novèmber 2021, a bisa ku e avion a yega for di Santo Domingo na momentu ku el a kuminsá eksperensiá “difikultatnan tékniko”.
“E tren di aterisahe di Red Air #203 prosedente di Santo Domingo a pega den nanishi di e avion, kual a provoká e kandela”, segun indikashon di e kuenta di Twitter di Aeropuerto Internashonal di Miami.
Hunta Nashonal di Seguridat di Transporte (NTSB), e agensia gubernamental merikano enkargá ku investigashon di aksidentenan di aviashon sivil, a tweet ku su ekipo lo yega Miami djárason.
