NEW YORK, AFP.- Un avion militar ruso ku material médiko a yega Merka djárason, segun un representante di Rusia den Nashon Uni.
E avion Antonov12 a aterisá na JFK Airport na New York, e episentro di Merka su krísis di coronavírus. Rusia su minister di defensa a anunsiá anteriormente ku e avion “ku masker i ekipo médiko na bordo” a sali den oranan di anochi pa Merka, sin duna mas detaye. Videonan di e ministerio a mustra e avion kargá ku kahanan preparando pa lanta buelo na un base militar aéreo serka di Moscow djárason mainta. E ministerio a ninga di duna AFP mas informashon relashoná ku e entrega, kual a wòrdu realisá despues ku e presidente ruso Vladimir Putin a kombersá ku e presidente merikano Donald Trump djaluna.
Rusia a manda nesesidatnan médiko i algun eksperto pa Italia anteriormente. Moscow a bisa ku e yudansa pa Italia a inkluí 100 spesialista di vírus ku eksperensia di otro malesanan manera Ébola. Pero media italiano a indiká ku mayoria di e yudansa aki no tabata útil pa yuda den e kombate kontra e vírus.
Aktualmente Merka tin mas di 206.000 kaso di coronavírus konfirmá, kual ta esun mas haltu ku kualkier pais, segun indikashon di Universidat Johns Hopkins. Rusia mes a registrá un oumento sin presedente den e kantidat di infekshonnan, ku 2.777 kaso i 24 morto konfirmá, segun sifranan mas resien djárason.
