Meskos ku Kristu a keda lanta for di morto i ta hiba un bida nobo, pa medio di e poder glorioso di e tata, nos tambe por hiba un bida nobo. (Romanonan. 6-4)
Ku onda pena, pero konforme ku boluntat di Dios
FUNDASHON BIRGEN di ROSARIO
ta anunsiá fayesimentu di señora
Rubia E. Bodak-Adamus
mihó konosí komo zùster Rubia
Zùster Rubia a kore stazje na Fundashon Bírgen di Rosario, departamentu Huize Welgelegen (Habaai ) i mesora a disidí di drenta servisio ofishal 1 di òktober 1982 komo Bejaardenverzorgende.
For di e tempu ei zùster Rubia a traha ku hopi amor i dedikashon na bienestar di nos grandinan. Zùster Rubia a bai traha despues na departamentu di Pasadia Mi Amparo i a desaroyá su mes riba e tereno di aktividat di hende grandi. Na desèmber 2000 zùster Rubia a bai traha na Richardushuis i a sigui funshoná komo zùster i tambe hasi aktividat ku nos hende grandi nan. Zùster Rubia tabata dominá e parti di kuido i aktivá nos grandi nan di un forma tremendo.
Zùster Rubia, semper lo keda den nos memoria e trabou ekselente ku bo a hasi, na bienestar di nos grandinan i e karakter trankil i dushi. Nunka bo a keha kansansio den bo trabou. Semper bo a pone e hende grandi nan ku bo tabata guia i kuida promé i tambe bo kolega nan.
Nos ta gradesí Dios di por a topa ku bo riba e mundu aki.
Danki pa loke bo a nifiká pa nos grandinan i pa nos.
Ta risibí bishita di kondolensia djaweps dia 22 di desèmber di 1or pa 4or na El Tributo. Lo tin un respòns na El Tributo mes i e akto di entiero ta tuma lugá na Santana Katóliko di Montaña.
Hunta di Supervishon, Gerensia, Grandinan i Personal di Fundashon Bírgen di Rosario ta deseá, famianan Bodak, Adamus hopi forsa den e dianan difísil aki.
