MADRID, AP.- Gran parti di sùitost di Spaña a keda asotá pa áwaseru fuerte den mas di un siglo, kual a kousa por lo ménos dos morto i destrukshon.
E servisio regional di emergensia a informá ku un dama di 51 aña i su ruman di 61 a wòrdu deskubrí sin bida den un vehíkulo na Caudete, 100 kilometer na sùit di Valencia, segun indikashon di e agensia privá di notisia spañó Europa Press.
E funshonarionan a informá inisialmente ku e mortonan ta trata di un pareha kasá di 70 aña, pero a hasi e korekshon aki despues.
E Departamento di Bombero di Valencia a tweet ku ekiponan di emergensia a reskatá tres persona den un riu, entre nan un hòmber di 57 aña i su yu di 33 aña, segun indikashon di Europa Press. Un helikòpter a salba un terser persona.
Kuater polis a resultá leshoná den e operashon di reskate.
E Agensia Estatal di Meteorologia a atvertí ku e region ta na peliger i a pronostiká un presipitashon di mas o ménos 90 milimeter pa ora i di 180 milimeter den mas di 24 ora.
E tormento a pasa riba provinsia di Valencia, Alicante i Murcia, tur na kosta mediteráneo, durante djaweps i djabièrnè.
Un funshonario a bisa ku e áwaseru ta esun mas fuerte registrá ku mas di 400 milimeter akumulá te ku djaweps atardi.
Rodriguez a agregá ku e munisipio lo pidi e gobièrnu sentral pa deklará un emergensia den e área.
