NEW ORLEANS, AP.- Ounke e depreshon tropikal Barry no a kousa inundashonnan katastrófiko na New Orleans, esaki a inundá partinan di Louisiana ku 43 centimeter di awa i a transformá e parti delta di Mississippi den “un oséano”.
E tormenta tropikal a degradá djadumingu atardi pero su áwaseru torensial a sigui menasa djaluna. Gran parti di Louisiana i Mississippi ta bo di vigilansia pa inundashon repentino, inkluyendo Arkansas, ost di Texas, wèst di Tennessee i sùitost di Missouri.
E gobernador di Louisiana, John Bel Edwards, a ekspresá ku e ta “ekstremadamente kontentu” ku e tormenta no a kousa e inundashonnan katastrófiko ku a wòrdu pronostiká. Mas di 90 persona a wòrdu reskatá den 11 lokalidat, pero no tabatin informe di mortonan relashoná ku e klima, segun Edwards.
Pero Barry a sigui menasa algun parti di Louisiana, partikularmente den áreanan na nort di lago Charles, kaminda riu i rioleringnan a kuminsá yena. E fenómeno a kousa 43 centimeter di áwaseru na sierto parti di e estado, segun deklarashon di Servisio Meteorológiko Nashonal djaluna.
Mississippi a registrá 20 centimeter di áwaseru na kondado Jasper i Jones.
