WILLEMSTAD.- Fundashon Nos Grandinan a bini ku un inovashon: Bispu di 100 aña tambe ta un selebrashon, ta e lastu dia pa selebrá 99 aña di bida. Mirando ku e persona enkuestion i su famianan ya ta den un euforia, wardando 12’or di anochi bati pa e 2 sifranan bira 3 sifra, Fundashon Nos Grandinan tambe ke aportá na e ambiente sperando 100 aña ku presensia di medionan di komunikashon i tambe animashon musikal. E inovashon aki a kai den bon tera i lo kontinuá ku bishita “Bispu di 100”.
Awe, 14 di aprel, Kòrsou tin un Sentenario nobo di e bario di Mahuma. Ta trata aki di sr. Pedro Martis, mihó konosí komo “Shon Bubu”, ku ta bin di nos hermana isla Boneiru. E Sentenario aki ta na kabes di 4 generashon, konsistiendo di 10 yu, 22 ñetu i 15 bisañetu. Famia kompletu ta felis, pero tambe tristu, debí ku apénas 2 aña pasá, esposa di Shon Bubu ku ta mama, wela i bisawela di famia, a fayesé. Shon Bubu ta bon di salú i un sabio ku hopi historia. E kabayero aki ta biba na su kas, rondoná pa su desendientenan i ta gosa di hopi amor. Huntu nan ta forma un famia musikal i hasta serenada familiar, e famia aki tin. Shon Bubu te awe ta toka su piano, keyboard, kitara, harmónika i sinfonia di boka tambe. Ántes, Shon Bubu tabata traha pa Shell komo Sleepboot Kapitein. Ora a puntra Shon Bubu ta kua ta su kuminda preferí, a resultá ku Shon Bubu tin hopi kuminda ku e stima i tur ta kumindanan krioyo, manera e.o. batata dushi, pampuna, guiambo, kònkòmber chikí, banana i tutu. Fundashon Nos Grandinan ta uni huntu ku famianan i tambe amistatnan pa pidi Bon Dios pa sigui bendishoná Shon Bubu i ku mas grasia abundante pa sigui mira mas aña di bida huntu ku su famia ku ta ador’é.
