WILLEMSTAD.- Awe, dia 30 di aprel UNESCO ta selebrá e di 10 aniversario di Dia Internashonal di Jazz.

Aki na Kòrsou, e fundashon lokal DOJACMC (Development of Jazz & Creative Music) ku a bira miembro di IJD na 2016, ta bai tene nan di kuater evento titulá:  “Virtual Jazz Appreciation Day” na Korsou 2021.

E propósito di IJD Appreciation Day ta pa duna atenshon na e género di músika global di Jazz ku ta eksistí pa mas ku shen aña, por medio un eksibishon virtual na un manera kreativo di mas ku 50 artista.

Huntu ku Biblioteka Nashonal di Kòrsou (BNK), e fundashon ta bai presentá nan kontribushon na e fenomenal evento aki na benefisio di e oudiensia lokal i internashonal.

E meta prinsipal di DOJACMCs Jazz Appreciation Day, segun e presidente, ta pa inspirá e siguiente generashon di cur-jazz, artistanan hóben, pa nan haña i eksplorá nan ekspreshon kreativo den e arte global di músika di jazz.

Segun e kofundadó i presidente di DOJACMC, sra. Edna Monifa Willekes-King “LadyMo”, P.R. i Marketing di BNK sr. Arthur Tholel, huntu ku BNK Events Coordinator Johnny Angelica, ta krea un eksibishon di Jazz históriko ku ta konsistí di tres kategoria: 1. Curaçao Jazz Legends; 2. Curaçao Artists i 3. Cool’s Corner: (Life & Legacy Dedication Wall)

A krea e sekshon di “Cool’s Corner” na honor di e fundadó di DOJACMC, saxofonista i kompositor, den felis memoria, John James Willekes, Jr. (1957-2019). Riba e “muraya virtual” bishitantenan por apresiá un selekshon di portrètnan i dokumentashon históriko, músika i komposishonnan di e legendario músiko di Jazz aki.

E otro sekshonnan lo ekshibí portrètnan, nòmbernan, dokumentashon, klepnan musikal i entrevistanan ku diferente artista lokal i internashonal grabá speshal pa e dia di Jazz.

Bishitá IJD DAY riba 30 di aprel

Biblioteka Nashonal di Kòrsou, den kolaborashon ku Fundashon DOJACMC ta habri e eksibishon virtual aki via e página di Facebook di BNK i e ta keda un eksibishon ku ta keda eksponé material di e género musikal di Jazz riba un base regular.

COVID-19 LOCKDOWN

Sra. Willekes-King a sigui splika ku e konsepto inisial pa nan di kuater selebrashon di IJD tabata pa un luna largu tene diferente aktividat na diferente sitio na Kòrsou titulá: “The First Jazz Appreciation Month in Curaçao”. Lamentablemente mester a para tur aktividat de inmediato pa kumpli ku e instrukshonnan di Gobièrnu pa ku e pandemia di COVID-19 pero e plan inisial lo kontinuá den futuro, siguiendo instrukshonnan i mandatonan emití.

Fundashon DOJACMC ta yama danki na tur kolaboradó i boluntario pa nan esfuerso inkansabel durante e lunanan di preparashon di e proyekto.

 

LAGA UN KOMENTARIO

Please enter your comment!
Please enter your name here