Grandinan riba 80 aña ta e promé grupo pa kobra
PARAMARIBO.-Awe ta un dia grandi pa pueblo di Sürnam. Un simpel proyekto ku a kuminsá 44 aña pasa awor a kristalisá i kombertí su mes den algu ku benefisio grandi pa tur surinameño. Presidente di Sürnam, su ekselensia Chan Santokhi a entrega na un grupo di siudadano di edat nan sertifikado di Royalty Voor Iedereen (RVI). Tabata hopi emoshonante di mira reakshon di e grandinan i tur presente pasobra awor si pueblo di Sürnam tambe a haña su parti di su rikesa nashonal.
RVI ta e desishon di gobièrnu di Sürnam pa duna tur siudadano di Sürnam su parti den e rikesa ku e petroli den supsuela di Sürnam ta trese pa e pueblo. Na 2020 estudionan a demostrá ku tin un kantidat enorme di krudo i gas den nan supsuela. Despues di hopi estudio e kompania franses Total a anunsiá invershon grandi pa finansiá e boramentu i pa saka e krudo. Ta kuminsá saka e krudo na 2025-2026 i ta kalkulá ku na 2028 esaki lo resultá den entrada kuantioso pa Sürnam. Na promé lugá Sürnam lo haña 20% di ganashi for di e eksplotashon. Na di dos lugá e pais lo risibí hopi bion di dòler na impuesto i na di tres lugá ta ‘royalties’. For di esaki ta kita un parti pa kumpli ku pago na institutonan internashonal ku Sürnam debe. E pais tin debe grandi di pasado. A refinansiá e debenan aki di tal forma ku pueblo por hala rosea, pero parti di e akuerdo ta ku Sürnam ta paga e refinansiamentu di debe ku e plakanan ku e pais ta bai risibí entrante 2028. Pa loke ta trata e kompania estatal Staatsolie, esei a informá e presidente Santokhi, durante di reunion general di akshonista ku nan a konta riba un ganashi di riba 30 bion dòler den próksimo 20 aña. Esaki tabata e motibu ku presidente Santokhi a bisa ku tur surinameño ta bira riku.
E gobièrnu a disidí ku tur surinameño biba den e pais ta bini na remarke pa haña parti di e rikesa ku petroli ta trese pa e pais. E promé grupo ta hendenan di 80 aña i mas bieu ku ta risibí un sertifiká ku nan por bai banko kuné i kobra US $ 750 mesora. E di dos grupo ta hendenan ku un desabilidat. Tur otro hende mester registrá pa asina nan tambe por risibí nan parti.
Presidente Santokhi a refutá ku ta trata di un stunt polítiko, nèt den porta di elekshon. El a splika ku e komishon a hasi nan trabou i tabata na òktober di 2024 ku a bini klaridat riba e eksistensia i kantidat di petroli. Ta e ora ei numa a kuminsá hasi análisis kiko por hasi.
E hóben ku registrá òf e baby ku su mayornan a registrá su nòmber ta bini na remarke pa kobra e sèn na momentu ku e yega 18 aña.
Presidente Santokhi a enfatisá ku RVI no ta un debe. E sèn ku ta duna na pueblo di Sürnam lo no tin niun efekto negativo riba e debe di pais Sürnam.
