WILLEMSTAD.- Ayera nochi tabatin e último ensayo pa loke ta trata ‘Tumba Revival Festival’. Durante sigur e último dos simannan nos por a sigui riba facebook kon e músiko i kantantenan tabata kompartí momentunan durante di ensayo.
E pida videonan i tambe potrètnan a trese rekuerdonan i sigur a kontribuí pa promové e djabièrnè anochi kaminda tumbanan di 2001 te ku 2020 lo keda presentá ‘bibu’ pa un orkesta bou di direkshon di Gregory Colina.
‘DEN E BEMBE’ a kombersá ku Feco Gomes, ayera nochi i el a indiká ku e ta premirá ku e ‘Revival Festival’ lo bira un anochi great. ‘AMAK huntu ku su partnernan i Gobièrnu di Kòrsou tin un tremendo regalo pa pueblo di Kòrsou’.
E interes di parti di pueblo tambe ta basta grandi. Si bo tuma nota dje kantidat di ofertanan ku tin pa snek bo ta yega na e konklushon ku awe nochi rònt Kòrsou tur hende lo ta sintá dilanti di televishon pa mira e festival.
Djárason durante di rueda di prensa Feco a indiká ku e interes for di Aruba, Boneiru, St. Maarten i Hulanda tambe ta haltu i e ta premirá ku e festival lo kibra tur rèkert di sintonia awe nochi.
ORARIO
E show di awe nochi ta kuminsá 7 or di anochi, asina Feco a indiká ayera nochi. Ta kuminsá 7 or pa por kumpli ku tur e eksigensianan konforme e protokòl ku a risibí di Gobièrnu.
E banda Excellence lo kompaña Mr. Saab, Tico Libiee i Gibi Doran kendenan lo interpretá kada un dos tumba di kompositornan Rignald Recordino, Boy Dap i Harry Zimmerman.
E orkesta bou di direkshon di Gregory Colina lo kompañá nos Rei i Reinanan di Tumba òf e kantante ku a skohe pa interpretá nan tumba ganadó.
Riba e potrètnan ku ta kompañá e artíkulo nos por tuma nota di algun momentu durante dje último ensayo ayera nochi den Festival Center.
