Awe Rhuggenaath i Knops ta firma e akuerdo: riba strategia di kresementu

WILLEMSTAD.- E tim di ámtenar ku ta na Hulanda a konkluí djarason e negosashonnan pa yega na un akuerdo riba e areglo entre Kòrsou i Hulanda relashoná ku e strategia di kresementu di gobièrnu di Kòrsou. Awe mainta mes ta hasiendo trámitenan pa tantu sekretario di estado Hulandes, Raymond Knops i promé minister Eugene Rhuggenaath firma e akuerdo riba e strategia di kresementu di Kòrsou.

E areglo ta enserá tur e pasonan ku Kòrsou ke tuma pa yega na situashonnan faborabel pa logra kresementu ekonómiko, mihó maneho di finansa públiko i alabes desaroyo sosial ekonómiko den barionan. Hulanda for di yanüari último a komprometé pa yuda Kòrsou den e trayektonan aki i awor pues a yega na palabrashonnan final kon esaki ta bai tuma lugá.

E akuerdo aki sinembargo no ta nifiká ku e konseho ku Kolegio di Supervishon Finansiero a duna Konseho di Minister di Reino pa duna Kòrsou un instrukshon ta for di mesa. Pero awor ku e akuerdo entre Kòrsou i Hulanda ta kla e chèns ta grandi si ku Konseho di Minister di Reino lo konsiderá pa por lo mui mínimo posponé un posibel instrukshon riba Kòrsou.

Di mes gobièrnu di Kòrsou mester kana tambe e kaminda pa riba término kòrtiku subi su entradanan i asina kuminsá eliminá e debe presupuestario di último 3 aña ku pa fin di 2019 lo ta alrededor di 112 mion florin. Riba medidanan manera oumento di omzetbelasting, akseins i impuesto pa rekohé sushi gobièrnu ke drenta den un diálogo nashonal ku partnernan sosial pa yega na un kònsènsùs.

SHARE

LEAVE A REPLY