Mirieta Lourens de Lanoy
Awe 8 di Mart gran parti di mundu ta selebrá Dia Internashonal di Hende Muhé. Nashonnan Uní a skohe komo tema pa e aña aki; Aselerá Akshon. Riba e ‘dia’ ta para ketu riba kontribushon di hende muhé den vários área, lanta konsientisashon pa igualdat di género i promové empoderashon. E siman aki nos tin Mirieta Lourens de Lanoy den nos programa di djasabra pa nos konosé un tiki mas di dje siendo entre otro presidente di WoMen Steering Committee Curacao i tambe e desaroyo di hende muhé por lo general.
Mirieta a konta nos; Mi trayektoria ta hopi largu. Mi ta un hende ku ta gusta ta aktivo. Mi a kuminsá den Jaycees i hasi yen kos. Mi a traha diferente kaminda pasobra mi no por haña mi hopi aña tras di otro riba mesun kaminda, mi a disidí di sigui dado momentu ku mi mes kompania Kibrahacha HR Consultancy i ku esei mi ta trahando vários kaminda. Mi a traha 2 aña i 5 luna na Boneiru na un hotèl ku tabata algu otro pero tempu a yega pa mi bin kas bèk. Pa loke ta Steering Committee, tur kos a kuminsá asina aki. Mirieta a konta ku e tabata den ala femenino di partido Man i dado momentu Steering Committee tabatin mester di hende den nan direktiva. E ala Femenino di Man a manda Mirieta pa e representá nan. Mirieta a bai ku e intenshon pa e forma parti di e direktiva komo komisario. Pero a resultá ku esun pa presidente na 2022 a disidí e no ta bai mas pa presidente. Nan tabata buskando un hende pero niun hende tabata e i el a disidí di bai pa e tòg. Asina Mirieta a postulá su mes komo presidente i sala a vota. Steering Committee ta un organisashon ku tin 32 grupo di dama afiliá. I asina Mirieta a keda skohe pa Steering Committe Kòrsou di 2022 pa 2024. El a traha i hasi su trabou ounke na Boneiru. Dia 8 di mart 2024 nan ta bolbe skohe pa presidente i e bia aki pa un periodo di 3 aña.
Probechá kada momentu
Mirieta ta hasi e trabou aki ku hopi plaser pasobra e ta gusta loke e ta hasi. Bo ta haña bu ku hopi tipo di hende, prinsipalmente hende muhé ku mester di un push ratu ratu. Siguiendo riba su mes el a bisa ku el a pasa den un periodo difísil kaminda el a haña kanser na pechu na 2018. E ta yama su mes un sobrebibiente. Mirieta a bisa ku el a pasa hopi malu i a kere asta ku e ta bai muri. Pero el a haña un di dos chèns i mester probechá di kada momentu pa hasi kos.
Mi ta felis ku mi bida
Mirieta a bisa ku e ta felis ku e bida ku e tin aki. Banda di tur loke el a pasa aden, su desaroyo e ta kasa di Farley Lourens kiermen tur hende por komprondé e último periodo ku a pasa aki (tumba). Mirieta ta konsiderá su mes un persona ku no tin límite, semper e ke mas i mas i p’esei e ta den Steering Committee pasobra einan komo hende muhé bo ta logra hopi. Por ehèmpel el a bisa ku si wak e hóbennan profeshonal, nan ta bai pero e hende grandi no ke hasi masha. P’esei e ta bisa tur e damanan pa no sinta ketu i ta netamente einan e ta.
Hopi potensial
Pa loke ta e desaroyo di hende muhé por lo general na Kòrsou, Mirieta a bisa ku e no ke bai den muchu detaye, voral mirando kuantu kos ta pasando último dianan i ku e hende muhé ta laga otronan us’e. E ta lamentá esei. E ta haña ku e hende muhé tin potensial pa hasi kos i mester tin e spiritu pa hasi mas. E por komprondé e dama ku a bisa di a kansa pero e ta haña tambe ku e hende muhé mester bai tur ku tin. Si e wak e gruponan afiliá na nan, tin ku ta interesá pero tin tòg hopi bia mester haña e empuhe pa por sigui padilanti.
Hende muhé ta bria riba tur tereno
Komparando e muhé i e hòmber i si e ta haña ku e hende muhé a keda atras, Mirieta a kontestá un NO kategóriko. E no ta haña ku e hende muhé a keda atras. Si wak universidat, tin mas hende muhé ku hende hòmber. I p’esei e ta kontentu ku Nashonnan Uni a disidí ku ta bai degender i ku mester trèk e hòmbernan tambe. “Nos tur ke pa e hòmbernan bai mee i no keda atras”, asina Mirieta a bisa. Por konkluí si wak e desaroyo di e hende muhé, ku esaki su bos ta wòrdu skuchá. E rekonosementu tei sigur sigur.
Muhé por tur kos
Tambe nos ke sa si Mirieta ta kompartí e opinion ku hende muhé por tur kos. El a kontestá nos ku hende muhé por hasi tur kos basta nan ke. No ta kuenta di esaki si i otro no. Pero loke ta molesti’é ta ku e hende muhé hóben ta bisa ku nan tin tur kos, trabou, outo kas i no mester di e hòmber pa nada., Pero e hende muhé mester di e hende hòmber. Bo no por ta mama i tata kiermen e yu mester di e tata. Einan tin kosnan ku mester traha riba dje pero e hende muhé por tur kos si.
Konosé bo mes
Loke e ta kere ku e hende muhé mester traha riba dje pa loke ta su desaroyo ta pone spil bo dilanti i konosé bo mes. Sa ken bo ta, kiko bo ke logra den bida. Pone bo metanan i wak pa alkansá nan., Hopi no ta traha dirigí unda ke bai den bida i esei ta e fout ku e hende muhé tin bia ta kometé.
Empoderá muhé i hòmber
I di parti di e organisashon ku e ta na kabes di dje esta WoMen Steering Committee, nan ta duna masha hopi training i aktividat. Den tur aktividat nan ta sòru pa tin un momentu di siñansa., I nan plannan di akshon tin i proyekto, training, nan ta hasi rekoudashonnan di fondo i ta hasi hopi pa empoderá e hende muhé pa e yuda su mes. I awor nan ta empoderá e muhé, hòmber i su famia pasobra e mester ta un totalidat. Si empoderá e muhé i hòmber, aki poko dia no tin famia.
Selebrashon di dia di hende muhé
WoMen Steering Committee tin un direktiva di 9 persona i tin un direktiva diario i tin komisarionan. Kada un ku nan tarea. Ta reuní kada 2 siman i aña pasá e organisashon a hasi 50 aña. Nan ta hasi diferente proyekto pa komunidat. Bo mester ta den un grupo pa por drenta. Awor nan ta okupá ku Bándabou tambe. Mester di hóbennan i esei na ta trahando riba dje. Tur aña nan tin nan plan di akshon pa sa kiko ta bai hasi e aña ei. Relashoná ku e dia di awe, nan tin un misa pa pueblo general na Misa di Sta Maria pa 9 or di mainta i einan ta ferwaktu tur hende pa bai tuma bendishon i den transkurso di atardi tin selebrashon chikí pa gruponan. Durante di e anochi tin nominadonan pa e Steering Award. E aña aki tin 9 nominado i e eks presidentenan tambe lo keda pone den lus i nan lo haña rekonosementu. Tambe tin invitadonan ku a bini di afó pa e okashon aki i nan lo hasi bishita na diferente persona den komunidat.
Klup di dama ta pa hóbennan tambe
Hopi bia ta wak e klup di dama komo algu pa hende di edat. Esei ta e konsepto ku tin pero esei no ta bèrdat. E klup di dama ta kaminda por siña hopi mas. Nan ke trese e norma i balornan di ántes i tres kosnan tiki tiki. Tin proyektonan spesial pa hóbennan pa trese nan serka. E klup di dama ta hasi hopi kos, nan ta biaha i konosé otro kultura i hopi mas. No ta simplemente bin huntu i hunga bon kuné i bon kuné pero ta duna e hende e chèns pa siña muchu mas.
