Mas ku 223 mion florin a bai pa yuda pago salario i empresarionan
WILLEMSTAD.-For di momentu ku Covid-19 a hasi su entrada na Kòrsou na 2020, gobièrnu a krea e insentivo pa yuda empresanan pa mantene trahadónan na trabou ku supsidio pa pago di salario (NOW) i despues a añadí supsidio pa sosten pa empresario individual i supsidio pa gastunan fiho. Tur ta danki na fiansa ku ta hasi na Ulanda. Di e tempu ei te awor alrededor di 223 mion florin a bai pa paga e supsidionan ariba menshoná. Den investigashon di gobièrnu su aparato ta resultá ku pa awor e nesesidat tei ainda pero den mesun rosea mester kuminsá terminá e supsidionan aki gradualmente.
Sra. Mook di minister di Desaroyo Ekonómiko (MEO) di un forma kla a splika ku te awor a paga 34 mion na TBZO ku ta e sosten pa empresario individual. Pa loke ta trata NOW a paga 135 mion, esei pues ta e supsidio pa pago di salario i finalmente pa loke ta trata TVL ku ta e supsidio pa gastunan operashonal fiho a paga 53 mion pa yega na un total di 223 mion.
Esnan ku mas tantu a hasi uso di TBZO ta den transporte publiko pero tambe barberia i otronan ku ta lora man. Den kaso di NOW a nota ku durante i despues di lockdown e kantidat di petishonnan a subi spesialmente den sektor di turismo/horeca i benta por detal. Algu ku meresé atenshon ta e echo ku a nota ku kompanianan ta pronostiká un pèrdida muchu mas grandi i asina ta pidi muchu mas tantu sèn di NOW. Kontrali na impreshon pero ta 80% di kompanianan ku hasi petishon pa NOW ta haña esaki. Por a nota tambe ku ta e mesun kompanianan ku ta apliká pa NOW ta apliká pa TVL.
Sra. Mook a konkluí bisando ku tin nesesidat di e areglonan di yudansa aki ketu bai pasobra ainda nos ta den pandemia, e kresementu ekonómiko proyektá ta kasi nada manera Banko Sentral i otronan a informa kaba. E forsa di kompra ta sigui baha na momentu ku banda di tur e situashonnan menshoná tin oumentu di preisnan tambe. Pues tin nesesidat pa kontinuá pero mester kuminsá traha pa terminá e areglo pero di forma gradual i asina evitá mal uso tambe.
