PHILIPSBURG.-Desishon a kai na Sint Maarten. Konseho di Minister a anunsiá nan desishon pa loke ta trata karnaval i tambe Heineken Regatta. Ámbos a keda kanselá pa aña 2021. A yega na e desishon aki despues di vários konsulta ku gruponan di interes, inkluyendo profeshonalnan di salubridat públiko i outoridatnan hudisial. Den un prinsipio a presentá un plan den kua por a nota ku a konsiderá e posibilidat pa redusí e kantidat di aktividatnan pa karnaval 2021 i tambe di e regata. Entretantu a informa St.Maarten Carnival Development Foundation i Heineken Regatta ku definitivamente no ta sigui ku organisashon ni ehekushon di niun di e dos eventonan aki.

Segun outoridatnan di salubridat di St.Maarten e promedio di kantidat di kasonan aktivo di Covid-19 ta kresiendo di forma kontinuo, no solamente debí na enkuentronan durante di dianan di fin di aña pero tambe debí na komportashon di e poblashon. E pronóstiko ta ku e kasonan lo por sigui subi.

Ta bin aserka ku ta detektando algun variante nobo di Covid den diferente pais. Esaki sigur lo bai pone mas preshon riba e kantidat di personal disponibel den sektor di salubridat i kuido. Konsiderando tur esakinan Konseho di minister di Sint Maarten a disidí ku ta para selebrashon di karnaval i tambe regata pa e aña aki.

 

LAGA UN KOMENTARIO

Please enter your comment!
Please enter your name here