WILLEMSTAD.- Si ántes tabata adultonan ku ta esnan ku ta dominá den kontagio ku e vírus di COVID-19, awe por nota ku tin kambio den esei, i por nota ku ta bou di hóbennan e problema ta sinta. I esei ta un situashon serio den e grupo bou di 24 aña di edat. Asina Dr. Izzy Gerstenbluth a duna di konosé durante un enkuentro ku prensa ayera mèrdia. Di akuerdo ku e último informenan riba e pandemia, e kantidat di kontagionan a sigui subi i ayera a alkansá 84. Pero ku e tendensia aki tin di spera ku e ta sigui subi.
Ta asumí ku e variante di Delta ya ta na Kòrsou i ta un variante ku ta plama hopi lihé. I teniendo kuenta e último desaroyonan na Kòrsou ku un kantidat di evento unda tabatin aglomerashon di hende, tin di asumí ku el a plama bou di nos mes. Tin kontagionan unda tabatin selebrashon, pero tambe tin kaso di famianan ku a registrá tur hende komo positivo.
Segun sr. Gerstenbluth, si anteriormente tabata papia di hendenan di entre 40-60 aña komo e grupo di mas kontagio, awe por nota ku tin un kambio. Dos tersera parti (2/3) di tur e kontagionan den e último dos simannan ta di personanan bou di 24 aña di edat, pues hendenan hóben. Por sierto, esaki ta e tendensia ku ta notando na Hulanda tambe, esta di hendenan hóben ta registrá mas tantu komo positivo. Ademas ta hendenan ku no a ser vakuná.
Si mester amplia e grupo i kue entre 25-40 aña, anto e ta representá un 85% di hendenan ku a Sali positivo den e último dos siman. Remarkabel tambe ta ku e hendenan den e grupo aki ku ta kontagiá no ta (kompletamente) vakuná, esta ku nan a haña 2 angua. Ta na momentu ku bo a risibí tur dos vakuna bo ta kompletamente protehá. Mas ku 85% di e hendenan ku a keda infektá e último dos simannan no ta protehá.
Vakunashon ta e mensahe ku konstantemente gobièrnu ta manda pa por protehá e pueblo. I pa hendenan ku ta duda un tiki ainda, ku e variante Delta, ku ta plama mas lihé i ku bo no ta kompletamente protehá ku un prek so, ta importante pa tuma e di dos angua. Pues si bo ta duda, awor ta e momentu pa tuma e desishon i bai tuma bo vakuna.
Na di tres lugá ta prinsipalmente hóbennan ta kontagiando otro. No lubidá ku gobièrnu a habri e posibilidat pa vakuná hóbennan di 12-17 aña tambe. Pues ta rekomendabel pa hóbennan, prinsipalmente esnan ku tin di biaha pa nan estudio, tuma nan vakuna. Ta e úniko forma pa nan ta vakuná kontra COVID-19, i tambe un protekshon kontra esnan ku ta rondoná bo.
