Awor t’e bon momentu pa invertí na Kòrsou

Nos ta drentando e siman di Cinex Smart Investment Summit 2019. Dianan 28 i 29 di ougùstùs awor ta e di 4 edishon di loke nos por kalifiká komo mas ku un konferensia, pero un shou kompleto pa trese invershonistanan Kòrsou i pa motivá empresarionan di Kòrsou tambe pa eksportá.  Ramon Koffijberg direktor ehekutivo i Raymond Jamanika direktor di desaroyo di invershon “smart’ i IT di Cinex a konta Djasabra e meta di e summit i kiko por spera di e 2 dianan ei. Esaki ta di 4 aña ku nan ta organisá e summit ku tin un total di 14 orador internashonal ku lo papia di unda nan pais ta bayendo den e mundu di avansenan usando teknologianan nobo denter di nan ramo.

 

Kòrsou ta ideal….

Kon e summit aki ta pas den e komunidat di Kòrsou. Raymond a bisa Djasabra ku nan a kuminsá na 2016 ku e idea pa krea un plataforma nobo pa trese invershonista pa Kòrsou. Esaki ta e ròl kardinal di Cinex esta pa atraé invershonistanan internashonal i lokal i sirbi komo un fasilitadó pa nan. Den e konsepto di Smart Cities nan a bai mas profundo. Nan ta buska invershonistanan ku ke trese nan konosementu i kapital pero tambe amplia loke Kòrsou tin. Esta krea un situashon ekonómiko sosial nobo, inovashon basta importante. Nan ke pa e invershonista trese su inovashon Kòrsou i usa Kòrsou komo un plataforma pa tèst esaki. Riba e punto di Tèst mester bisa ku no ta asina ku Cinex ta usando Kòrsou komo literalmente un tèst esta prueba, pero si e empresa/empresario/invershonista ta bezig den un fase di ‘start up’ i tin eksperensia, flow di entrada, i empleadonan kaba i ke amplia i haña resultado mas lihé, Kòrsou ta e lugá ideal.  Hasiendo e invershonnan pa un negoshi na Kòrsou, e invershonista por adaptá mas lihé na e nesesidatnan di e pueblo, siendo Kòrsou ku un komunidat chikí di 160 mil hende kompará ku ora bai siudatnan grandi. Ora e invershonista yega Kòrsou e mester topa ku e konosementu di loke ta pasando internashonal na Kòrsou. Kòrsou mester sirbi komo un ‘start up’ pa e invershonista, kaminda por kuminsá ku yen di kos nobo. I ta den e kuadro aki e summit ta pas presis pa Kòrsou aktualmente sigur.

 

Populashon diversifiká….

Ta bin aserka ku Kòrsou tin un populashon masha diversifiká, segun Ramon.  No ta solamente ta haña un grupo di sierto entrada aki pero ta un pueblo amplio den un komunidat chikí i e resultadonan na su turno ta yega mas lihé, entrada ta bin mas mihó i asina invershonista tin henter e region rònt di dje pa ora e ta kla, por sigui pa e siguiente paso. Esei ta kalifiká komo un kresementu orgániko i esaki ta loke Cinex ta para pe.

 

Brand Kòrsou internashonalmente…..

Pa un summit di e magnitut aki, ku 14 orador di taya, no ta fásil pa yega na e invershonistanan pa bin Kòrsou pa mira kiko Kòrsou tin di ofresé. Ramon Koffijberg  a bisa ku situashon di ekonomia ta difísil i no ta na Kòrsou so pero den Karibe i Oropa tambe por mira e situashon ta difísil. Nan di Cinex, komo fundashon di gobièrnu, tin den nan tareanan pa na na e banda positivo di e kos. Nan no ta konsentrá kiko ta bai malu pero ta ‘brand’ Kòrsou internashonal. Komo pais chikí di 160 mil hende so, i wak otro paisnan muchu mas grandi ku nos, e ròl aki di Cinex ta esun di mas importante. Ora ‘brand’ bon, e hende ta bin i komo Kòrsou ta kai den e mesun leinan ulandes oropeo, por bisa ku finalmente e hendenan mes ta kue nan kaminda i ora e kos pega òf e no ta bai, semper ta bin bek serka Cinex ku ta sirbi komo e fasilitadó di e proseso.

Cinex ta merkadeá pa e invershonista. I un bon invershonista ta invertí den un merkado malu i no den un merkado ku ta riba su pik pasobra e no ta wak e rendimentu di su invershon manera e lo ke. Awor aki ta bon momentu pa invertí na Kòrsou segun Ramon a bisa.

 

Turismo te merkado ketu bai ku ta hala atenshon…..

Tabata interesante pa sa kua merkado ta esun ku ta hala mas invershonista Pa Ramon Koffijberg  por mira e enfoke den turismo. Nan komo personanan ku ta biaha hopi i analisando e otro islanan ku Kòrsou, a yega na e konklushon ku Kòrsou ta un di e islanan di mas bunita i “nos mester siña apresiá e bunitesa di e isla aki”, Ramon a enfatisá. Kòrsou tin muchu mas ku un playa ku turista, aki tin kultura, historia, hopi posibilidat. Komo invershonista ora bin tur esakinan, un isla kaminda tur idioma ta keda dominá, mi ta kere ku ta esei nos mester. Turismo ta un karera i no un nesesidat”. Ramon ta kòrda ku tantu e komo Raymond a traha den horeka. E eksperensia ku bo ta haña; e rèspèt ku bo ta siña trata hende kuné ta pone ku si bo ke hasi karera den turismo, bo ta krese hopi lihé. Aktualmente tin diferente proyektonan den e área di turismo ku ta habriendo i ekspandiendo. “Tin e lus na final di e tùnel i nos tin di pasa dor di e tùnel i ora e trein para pa kuminsá bai den e tùnel, mester bula drenta den pa bai kuné”. Ku esaki el a enfatisá riba e “open minded” ku nos mester ta; lesa, skucha, wak televishon, bai den Youtube, Google i buska informashon.

 

Krese i inová…

Raymond a bisa ku nan ke bin ku algu nobo ora ta trata di turismo. Nan ta mira diferente moveshon tumando lugá, e logístika, e komunikashon, e teknologia, e turista no ta esun di 20 aña pasá i awe ta teknologia ta yud’é karga. Turismo ta un di e sektornan mas inovativo ku ta eksistí den ekonomia mundial i esei ta atraktivo pa e invershonista. E summit ke enfatisá ku, e aktividatnan diario ku tin, mester krese i inová.

 

Orguyoso….

Tantu Ramon komo Raymond ta sumamente orguyoso di e 3 promé añanan ku nan a organisá e Summit i e aña aki e ta primintí di bira mas grandi ainda si mira e kantidat di reakshonnan ku ya tin. E promé aña a organis’é na ougùstùs dor di BTP i Cinex a organisá di dje na novèmber. Despues di e promé Summit, BTP a bin ku e proposishon pa uni forsa i esei ta e relashon ku tin awor.  E gastunan di e summit ta hopi haltu mirando ku tin 14 orador internashonal.

Pero Kòrsou tin algu den dje ku e hendenan di afó ta gusta nos aki. Ramon a enfatisá ku nan no ta paga niun di e oradornan i tòg tur ta bin Kòrsou. I nan ta entusiasmá pa bin Kòrsou.

 

Kresiendo….

Tur aña e summit ta kresiendo mas i mas i e partnernan ta sigui krese den dje, Otro aña lo bira e di 5 bia. E aña aki mas ku tur i ku e summit mas grandi tambe ku e otro añanan, apesar di kon duru kos ta na Kòrsou aktualmente. Den prinsipio nan a duda si lo hasié òf no pero e partnernan ku asta den pasado lo no tabata por, e aña aki tur kompania a duna nan kontribushon. BTP ta e partner prinsipal, pero Ramon ta kontentu ku asta e partnernan chikí a bin aden pa sostené e summit su kontinuashon. I loke ta masha importante pa bisa segun Raymond ta ku e summit aki no ta pa traha sèn, pasobra e kontribushon di e partisipante ta  minimal pa loke e ta haña bèk.

 

No keda kas i tende kiko bo a pèrdè….

E summit ta algu kompletamente informal pa loke ta vestuario. E bishitante mester sintié kómodo, Por ehèmpel aña pasá a pone un bòrchi ku no ke niun hende ku dashi (ku eksepshon di ministernan). E aña aki ta konsentrá riba Orange Economy, esta e ekonomia di kultura, festival, arte teknologia, diseño. I p’esei ta pidi tur ku tei na e summit pa bin habri, bin tende kiko e presentadónan ta trese dilanti. Sea interaktivo ku otro. A skohe pa e ‘orange economy’ teniendo na kuenta tambe ku djis tras di e konferensia ta sigui e festival d Jazz CNSJ. Asina e turista no ta bin wikènt so pero ta bin un tiki mas largu. Esaki na su turno ta yuda hotèlnan, hürmentu di outo, restorant, aktividatnan na Kòrsou mes. Esaki ta duna otro kompanianan un chèns pa haña un poko negoshi spesialmente  e lunanan di ougùstùs i sèptèmber ku ta mas duru pa turismo. Esaki ta promé biaha ku nan ta hasié di e forma aki i e reakshonnan ta inmenso. E konferensia otro siman tur aña ta bai un otro direkshon, por ehèmpel aña pasá a pone bòrchi ku no mag drenta ku dashi i e aña aki ta bai den direkshon di entretenimentu,. Ramon ke atvertí tur hende ku ta un konferensia “on steroids” pasobra bo ta bai pasa den algu ku nunka niun kaminda di mundu no tabatin. “No keda kas i tende ku bo a pèrdè algu òf warda pa e ‘after movies’. Sali pa bo wak kiko nos a hasi. Mi mes ta tene mi kurason pasobra nos ta bai ‘overboard’ atrobe”, Ramon a enfatisá.

 

E konferensia aki tur aña ta subiendo di kantidat di partisipante. Aña pasá tabatin 300 hende pero e aña aki ya kaba a yega 350 i ainda tin algun dia ku hende ta warda na final pa inskribí. No ta bai pa e sèn di entrada pasobra nan no ta gana sèn ku e konferensia aki e ta bai pa Brand Kòrsou, pa mustra internashonalmente pa wak kon na Kòrsou por hasi un konferensia di e taya aki. i pa muchu mas informashon por subi e ‘site’ di curinfest.com.

 

 

Algun di e oradornan

Jeff Hoffman ta mundialmente konosí komo un tòp “Motivational Speaker”. Aparte di esaki e ta produktor di diferente pelíkula di Hollywood, TV shows, albùm di Jazz i fundadó di diferente “Start-ups”. Tambe Jeff a forma parti di kompanianan manera Priceline.com. uBid.com, ColorJar i hopi mas. Pa loke ta trata su kontribushonnan den e área di “entrepeneurship” Jeff a risibí e “Lifetime Achievement Award.

 

Dr. Hagen Rudowski ta di Porsche Corporate Alemania i ta e presidente i CEO di MHP Inc. Dr. Hagen Rudowksi tambe ta un konosido orador ku lo enfoká den e área di teknologia i efektonan di digitalisashon.

 

Den kuadro di e konsepto di Smart City, Gianluca Galleto, di Italia, ku ta e persona ku a kuminsá ku e konsepto di Smart Cities New York, lo bin kompartí tur su eksperensianan ku nos.

 

I mas for di entre otro Colombia, Merka, Slovenia i Hulanda.

Aparte di e 14 oradornan aki, Cinex lo sòru pa “Breakfast, Lunch, Entertainment” i tambe un “Cocktail Reception”, kual ta hasi posibel ku bo por engrandesé no solamente bo konosementu den diferente área pero tambe bo “netwerk”.

Por kumpra bo karchi riba www.smartinvestmentcuracao.com pa solamente $120,- (válido pa tur 2 dia). Pa kulminá e evento no lubidá ku tin e promé anochi di Curaçao North Sea Jazz dia 29 di ougùstùs mesora despues di Summit. Nos ta ofresé un ‘combo package’ pa esaki tambe.

Pa mas informashon por manda un mail na summit@curinvest.com  òf check nos facebookpage: cinexcuracao.

 

SHARE

LEAVE A REPLY