Ayanette Statia ta e direktora nobo di International Beauty & Fashion Foundation Curaçao

... Ayanette Statia ...

WILLEMSTAD.- Entrante 1 yanüari 2020 Ayanette Statia ta ofisialmente e direktora nobo di e prestigioso organisashon International Beauty & Fashion Foundation Curaçao (IBFF) ku a wòrdu funda pa e konosido i popular sr. Aubrey Amerika, ku na e momentu aki ta biba den eksterior i ta trahando riba plannan grandi internashonal.
Pa e motibu aki a start un proseso pa buska e direktor(a) nobo pa sigui ku e organisashon den su totalidat. E tim di IBFF ta sumamente kontentu ku e eskoho ku sr. Aubrey Amerika a hasi den persona di Ayanette Statia komo e direktora nobo pa e organisashon i ta kla pa sigui traha. Sr. Aubrey Amerika den estrecho kolaborashon ku Ayanette Statia, lo sigui hopi di aserka e organisashon i lo ta presente na momentunan importante.
Ayanette Statia no ta deskonosí den e mundu di beyesa aki na Kòrsou i tambe internashonal. Ayanette a aseptá e reto aki netamente komo parti di su selebrashon di 22 aña den mundu di beyesa i tin hopi espektativa pa tur loke e ta bai hasi den IBFF.
IBFF ta un organisashon di trayektoria largu den e mundu di beyesa aki na Kòrsou i ta orguyoso di tin mas ku 100 korona lokal i internashonal den diferente kategoria danki na e trabou profeshonal di sr. Aubrey Amerika.
Pa 16 aña konsekutivo IBFF ta organisá e sertámen mas grandi den beyesa pa teenager, kual ta Miss Curaçao Teenager, ku a keda gana pa e beyesa TKeyah Eugenio na Yüli 2019. Tambe 2 aña pasa, IBFF a habri oportunidat pa nos beyesa nan mas chikí i a forma e sertámen Mini Beauty International Curaçao ku e aktual ganador ta Zarah La Cruz.
Ayanette su meta komo direktora di IBFF ta pa den su propio estilo, sigui ku e bon trabou ku a wòrdu hasi durante tur e añanan i pa IBFF keda e plataforma pa nos mucha- i hóbennan konosé sertámen di beyesa lokal pero tambe internashonal. Pa nan ta ehèmpel pa otro hóbennan i konosé mas tantu di Kòrsou, turismo, arte, deporte, kultura, músika i representá nos isla dignamente.
Ya tur preparashon ta tumando lugá pa habri inskripshon pa Miss Curaçao Teenager i Mini Beauty International 2020. IBFF ta pidi pa sigui medianan sosial pa tur informashon i kosnan great ku ta na kaminda.
Ayanette lo sigui na kabes tambe di su skol di pasarela i etikèt, kual tur djasabra ta duna lès na muchanan for di 5 te ku 18 aña. Por sigui tur informashon di e skol via e página di facebook i instagram, bou di e nòmber: mesbyayanette.
IBFF ta gradisí pueblo di Kòrsou pa tur e sosten ku semper a gosa di dje i por sigurá ku den 2020 por spera muchu mas.

SHARE

LEAVE A REPLY