Ayera retiro inmediato a kai pa direktora di Biblioteka Nashonal

WILLEMSTAD.- Apénas algun dia despues ku a pone e direktora di Biblioteka Nashonal Kòrsou Frank Martinus Arion, sra. Gerda Willems riba non-aktif, ayera el a haña retiro di inmediato. Esaki a keda konfirmá pa abogado di e direktiva di fundashon di biblioteka mr. Berti Braam.

Sr. Braam a indiká ku e retiro di inmediato ta pa motibu di susesonan di djabièrnè último ku no por aseptá mas. Kiko e susesonan ta, e abogado no kier a bai den detaye.
Ayera EXTRA a publiká e notisia ku djabièrnè último a pone e direktora riba non-aktif, pendiente di e petishon di parti direktiva di e fundashon pa terminá laso di trabou kuné. Un dje motibunan prinsipal ta di un “verstoorde relatie”, ku pa basta tempu lo tin entre e direktiva di e fundashon, trahadónan pa ku señora Willems.
Aparentemente ta trata di un situashon di relashon di trabou ku kurso di añanan a keda empeorá i ku djabièrnè último a partisipá na e señora ku ta poné riba non-aktif, pendiente korte trata terminashon dje relashon di trabou kuné.

Minister Marilyn Alcalá-Wallé tambe ta papia di un relashon no sano na biblioteka ku el a heredá. Hasta e presidente di e fundashon anterior lo a tuma retiro p’e situashon deteriorá di relashon di trabou ku e direktora.
Den pasado ya kaba e direktora a haña vários atvertensia i hasta un “schorsing”. Pero djabièrnè e relashon di trabou a empeorá di tal manera, ku ayera e direktiva a duna e direktora retiro di inmediato. Kiko eksaktamente ta e “verstoorde relatie”, niun partido no ke bai den detaye.

SHARE

LEAVE A REPLY