WILLEMSTAD.- Relashoná ku e reklamo i opservashonnan ku algun kandidata pa e sertámen di Miss Curaçao 2021 a trese dilanti ‘EXTRA’ a kombersá ku sra. Aysjel Maria, direktor di Curaçao Beauty Pageant Committee, organisashon ku ta enkargá pa organisá Miss Curaçao.

Sra. Maria a kuminsá na splika ku e kandidatanan tin 1 aña ta preparando pa e sertámen. ‘Debí na COVID tur luna ta ‘Zoom’ ku e kandidatanan. Dor ku e periodo di preparashon a duna asina largu, nan a kuminsá bira demotivá’.

‘E screening ku a tuma lugá den fin di siman ta un kontròl ku semper nos ta hasi pa yuda nan pa drecha nan mes. Nos ta evaluá kiko ta e detayenan ku nan mester wak. Paso tin kosnan chikitu ku bo mester paga tinu riba dje pa evitá ‘bullying’, manera a sosodé aña pasá ku un dje kandidatanan.

E screening a tuma lugá na mi kas i den un esfera privá. Kada kandidata a haña un orario ku nan mester tabata presente pa dje forma ei atendé kada un privá. Esnan ku a atendé e screening ta un dama ku ta un ‘motivator’ i un otro dama ku ta duna konseho estétiko.

Nos ta chèk detayenan ku bo mester wak. Nan ta hóben i no ta konsiente. Tur e kosnan aki ta pa evitá ‘bullying’, nos ta wak e intensivo i hopi diplomátiko.

Nos ta guianan pa un bon presentashon pa nan mes. Porta nos a hasié un tiki lat pa motibu di COVID. E ta un konseho pa pueblo no kritikánan’, tabata splikashon di sra. Maria.

Ta di tres aña ku ta hasiendo e evaluashon di kandidatanan.

Sra. Maria splika mas aleu ku e alegashon di training ku pago ku esaki ta algu ku e señora ku ta biba na Hulanda a laga komo opshon. ‘Esun ku ke por ‘follow’ e señora i pa ékis preis for di aworakí te Aprel e ta guia bu. Bo por sigui train kuné. E opshon aki tin un preis mara na dje. E señora ta un ‘coach’ i ‘personal trainer’ i e ta Zoom ku e kandidata. Esun ku ta deseá por hasié. E señora  ta un eksperto’.

Sra. Maria a duna diferente ehèmpel di opservashon ku a duna e kandidatanan riba kon mester train pa drecha pia, produktonan ku por usa pa yuda ku kútis seku i asina por sigui menshoná.

‘ Ta hasi e evaluashon aki pa e kandidatanan no haña nan konfrontá ku ‘bullying’. Mi ta kere ku nan no tabata sa ku tur aña nos ta hasi e evaluashon aki. Ta mihó nos hasié ku keda sin hasié at all. Mi a hasié den un forma privá na mi kas. Niun kandidata no ta mira otro den ‘bathing suit’, pa niun no tin nada di bisa otro. Na e okashonnan previo, Aubrey a hasi esaki na Acoya. E evaluashon ta algu nesesario pa yuda e kandidatanan pa nan mes preparashon. Mi tin un lema: ‘Protehá boso imágen’. Mi sa kon dolor e por hasi’.

Sra. Maria a bisa ku e evaluashon no por tin nada di aber ku eksigí pa nan baha. ‘Mi tin un kandidata ku nos a aseptá ku ta hopi yen. Konsientemente el a opta pa partisipá na e sertámen. E mensahe ku e kier trese dilanti ta ku bo no mester ta flaku pa bo ta bunita. Pa bo ta bunita e beyesa mester sali di paden’. Finalmente sra. Maria a indiká ku CBPC tin derechi pa organisá e sertámen dos aña mas i ku e evaluashon ta forma parti di e programa di preparashon.

 

LAGA UN KOMENTARIO

Please enter your comment!
Please enter your name here